भक्तपुरको नगदेशमा महाकाली नाच आजबाट सुरु
![भक्तपुरको नगदेशमा महाकाली नाच आजबाट सुरु](https://annapurnapost.prixacdn.net/media/albums/mahakali-nach_ToUf5XFDHi_u2M0OGP64Q.jpg)
भक्तपुर : मध्यपुर थिमिको नगदेशमा ५ वर्षपछि हुन लागेको महाकाली नाच आजबाट सुरु हुने भएको छ। पूर्व कलाकारहरूको सक्रियतामा मध्यपुर थिमिको नगदेशमा महाकाली नाच सञ्चालनमा आएको हो।
यो मल्लकालदेखि नै नचाइँदै आएको नगदेशको पौराणिक र ऐतिहासिक महाकाली नाच हो। नाचमा ४ देवगण बन्ने कलाकार र मुहाली बजाउने मुहाली बाधकहरूको अभाव भएपछि निरन्तरता नपाएको पौराणिक र एतिहासिक महाकाली नाचले पूर्वकलाकारहरू र युवापिंढीहरूको सक्रियतामा ५ वर्षपछि निरन्तरता पाउँदै छ । नाच ४ दिनसम्म नचाइन्छ ।
नाचलाई सफल, व्यवस्थित रूपमा सञ्चालन गर्न मूल व्यवस्थापन समिति, भोज व्यवस्थापन समिति, अर्थ संकलन समिति, ख्वापा, तिसा, वस समिति, प्रचारप्रसार समिति गरी ५ वटा समिति बनाएको महाकाली गण नाच २०८१ मूल व्यवस्थापन समितिका अध्यक्ष कृष्णबहादुर घजुले बताए । पौराणिक कथा अनुसार एक समय मानबलाई भूत, दैत्य, प्रेत पिचास, दैत्य दानवहरूले निकै दुख दिएको थियो ।
दैत्य दानबहरूले मानवसँगै देवी, देवताहरूलाई समेत दुख दिएको थियो । स्वयम् देवता नै हैरान भएपछि देवी महाकाली उत्पति भइन् । उनले कालीको रूप लिएर देबी महाकालीले युद्धको तयारी गरिन् । त्यसपछि दानब, दैत्यको संहार गरिदिएको पौराणिक कथन छ । त्यसैले यस नाचलाई भगवती र दानबबीचको युद्धको तयारीका रूपमा लिइन्छ ।
महाकाली नाच निकाली टोल, बस्ती परिक्रमा गराए भूत, प्रेत, पिचासहरूले दुख नदिने जनविश्वास रहिआएको छ । महाकाली गण नाचमा जम्मा १७ जना कलाकार हुन्छन् । गणमा गण नायिका महाकाली, उपनायिका महालक्ष्मी, उपनायिका देबी, उपनायिका महालक्ष्मीको बहान सिंह, उपनायिका देबीको बहान मयूर, ४ जना बेटा, २ जना भूत भैरव (बाल मसान), २ जना कवा, दुई जना ख्याक, २ जना माक(बाँदर) र १ जना दैत्य गरी १७ जना कलाकार हुन्छन् ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)