साउदीमा दुर्घटनामा परी घाइते रामपाल सदाको उपचारका लागि आर्थिक सहयोग जुट्दै

साउदी  : वैदेशिक रोजगारीको क्रममा साउदी अरेबिया पुगेका सप्तरीका रामपाल सदा सडक दुर्घटनामा परी घाइते भएका छ्न् । गत ३० जुलाई २०२४ का दिन काममा जाने क्रममा रियाद सहरको ३५ नम्बर भन्ने स्थानमा स्कुटी दुर्घटनामा परी बायाँ खुट्टा भाचिनुको साथै  शरीरको दायाँ भागमा गहिरो चोट लागेको थियो।  उनको किङ खालिद हस्पिटलमा उपचार गरिएको थियो।

उपचारपछि १७ अगस्ट २०२४ का दिन कार्यरत कम्पनीमा जाँदा कम्पनीले भित्र छिर्न नदिँदा उनी उक्त सडकमै अलपत्र परेका थिए।  सदाले कम्पनीले आफूमाथि गरेको व्यवहारबारे  व्यवसायिक यम तमुलाई जानकारी गराएका थिए। 

त्यसपछि उनले अलपत्र परेका रामपालको बारेमा  राजदूतावास रियादमा तत्काल जानकारी गराएका थिए। अलपत्र परेका रामपालको उद्दारका लागि दूताबासले सम्बन्धित कम्पनी र निकायलाई खबर गरी स्वदेश फिर्ता पठाउने प्रकिया अगाडि बढाएको छ । 

दुर्घटनाबाट गम्भीर घाइते भएका  सदाको  बायाँ खुट्टा  भाँचिएर नचल्ने भएपछि उपचारका लागि  विभिन्न व्यक्ति र संघसंस्थासँग सहयोगका लागि आग्रह गरिएको छ। सहयोगीहरूबाट  हाल सम्म २९ सय साउदी रियल प्राप्त भएको छ ।

घाइते सदा वैदेशिक रोजगारीको लागि सन २०१९ मा साउदीको अल जजिरा सपोर्ट सर्भिस कम्पनीको लागि नेपालमा रहेको कोस्मो इन्टरनेशनल ओभरसिज प्राइभेट लिमिटेडबाट साउदी पुगेका थिए । उनी सम्बन्धित कम्पनीबाट भागेर अवैधानिक रुपमा काम गर्दै आएका  थिए।