परासी : नवलपरासीबाट करिब डेढ क्विन्टल रक्तचन्दनसहित एक जना पक्राउ परेका छन् । रामग्राम नगरपालिका–८ लोसडाबाट आइतबार ८१ थान रक्तचन्दन बरामद भएको हो । रक्तचन्दन लुकाएर राखेको भन्ने सूचना पाएर गएको सशस्त्र प्रहरी, नेपाल प्रहरी र भन्सार कार्यालयको संयुक्त गस्ती टोलीले स्थानीय प्रमोद गिरीको घरमा लुकाएर राखेको अवस्थामा १३० केजी रक्तचन्दन बरामद गरेको जिल्ला प्रहरी कार्यालयका सूचना अधिकारी डिएसपी रेशम बोहाराले जानकारी दिए ।
रक्तचन्दन प्रतिबन्धित वनस्पतिअन्तर्गत पर्दछ । भारतबाट नेपालहुँदै चाइनातर्फ लैजाने उद्देश्यले रक्तचन्दन ल्याएर लुकाएर राखेको हुन सक्ने प्रहरीले आशंका गरेको छ । चिनसम्म पुर्याउँदा यसको मूल्य प्रति केजी १५ हजार पर्न सक्ने प्रहरीले अनुमान गरेको छ । जसअनुसार यसको मूल्य १५ लाख १९ हजार हुन आउँछ । बरामद भएको रक्तचन्दन र पक्राउ परेका गिरीलाई आवश्यक कारबाहीका लागि डिभिजन वन कार्यालय पठाइएको छ ।
प्रहरीबाट पठाइएका व्यक्ति र रक्तचन्दनलाई साइटिस (दुर्लभ वन्यजन्तु तथा वनस्पतिको व्यापार महासन्धी) अन्तर्गत अदालतमार्फत कारबाही पक्रिया अगाडि बढाइने डिभिजन वन कार्यालयका वरिष्ठ वन अधिकृत मेघनाथ काफ्लेले बताए ।
महासन्धिअनुसार नेपालमा संकटापन्न वन्यजन्तु तथा वनस्पतिको अन्तर्राष्ट्रिय व्यापार नियन्त्रण ऐन २०७३ को पहिलो संशोधन २०७५ मा त्यस्तो कारोबार गर्ने व्यक्तिलाई १ वर्षदेखि ५ वर्षसम्म कैद वा १ लाखदेखि ५ लाखसम्म जरीवाना वा दुवै सजाय हुने व्यवस्था रहेको छ ।
अन्तर्राष्ट्रिय बजारमै प्रतिबन्धित रहेको उक्त रक्तचन्दन भने जुन देशबार आएको हो त्यही फिर्ता पठाउनुपर्ने प्रावधान रहेको वरिष्ठ वन अधिकृत काफ्लेले बताए । यसअघि २०६४ सालमा बरामद भएको ७६ क्विन्टल रक्तचन्दन फिर्ताका लागि भारतमा पत्रचार गरेपनि नलगेका कारण कार्यालयको गोदाममै रहेको डिभिजन वन कार्यालयले जनाएको छ । त्यसबेला पक्राउ परेका कारोबारमा संलग्न ५ जनाले अदालतबाट सजाय पाएका थिए ।
प्रतिक्रिया दिनुहोस !
