जसपा नेपालमा जिम्मेवारी बाँडफाँट
माओवादीबाट आएका शर्मा महासचिव, पूर्वमुख्यमन्त्री यादव रित्तै
भदौ ११, २०८१ मंगलबार ६:१५:१७
काठमाडौं : जनता समाजवादी पार्टी नेपालले महाधिवेशनको लामो समयपछि पदाधिकारी चयन गरेको छ । नेकपा माओवादी केन्द्र छोडेर १७ वर्षपछि जसपा नेपालमा फर्किएका रामकुमार शर्मालाई महासचिव बनाइएको छ । उनले अध्यक्ष उपेन्द्र यादवबाट महासचिव पद उपहार पाएका छन् ।
माओवादी केन्द्र अध्यक्ष पुष्पकमल दाहाल (प्रचण्ड)को साथ छोडेर वैशाखमा जसपा नेपालमा आएका शर्मालाई पार्टीको शक्तिशाली पद दिइएको हो । तत्कालीन मधेसी जनअधिकार फोरम नेपालको अध्यक्ष उपेन्द्र यादव र महासचिव शर्मा नै थिए । लामो समय अन्य पार्टीमा चाहारेर शर्मा अन्ततः उपेन्द्रसँगै पुगे । यसअघि मधेसको पूरा कार्यकाल मुख्यमन्त्री भएका लालबाबु राउतलाई पनि पार्टीको महासचिव चयन गरिएको छ ।
त्यस्तै, पार्टीको सहअध्यक्षमा रकम चेम्जोङलाई चयन गरिएको छ । चेम्जोङ अशोक राईसँगै जसपा नेपालमा गएका थिए तर अशोक राईले पार्टी फुटाएर निस्केर जाँदा पनि चेम्जोङले पार्टी छोडेनन् ।
पाँच जना उपाध्यक्षमा राजकिशोर यादव, मृगेन्द्रकुमार सिंह यादव, गोविन्द चौधरी, शिवलाल थापा मगर, विद्युत् बज्राचार्य छन् । त्यसैगरी उपमहासचिवमा प्रकाश अधिकारी, दीपक कार्की, रेखा यादव छन् । सचिवमा लीला सिटौला, शैलेन्द्र साह, सुनी लामा, राजकुमार राई, सुरेश मण्डल, लाक्पा शेपा, कमरुद्दीन राई, कोषाध्यक्ष सुरिताकुमारी साह चयन भएकी छन् । जसपा नेपालको राष्ट्रिय एकता महाधिवेशन जेठको २७, २८, २९, ३० गते गरेको थियो । जसपा नेपालले लामो समयसम्म पदाधिकारी चयन गर्न सकेको थिएन । माओवादी केन्द्रबाट फर्किनेबित्तिकै महासचिव भएका शर्माले खुसी प्रकट गरेका छ्न ।
‘मधेस विद्रोहमा उपेन्द्रजी मेरो नेता हुनुहुन्थ्यो, म उहाँको नेतृत्व मधेसी जनअधिकार फोरम नेपालको महासचिव थिए’, नवनियुक्त महासचिव शर्मा खुसी हुँदै भन्छन्, ‘मलाई अध्यक्षज्यूले विश्वास गर्नुभयो । तर, मलाई जिम्मेवारी पूरा गर्ने च्यालेन्ज आयो ।’ तर, अध्यक्ष उपेन्द्र यादव नेताको जिम्मेवारी बाँडफाँटमा चुकेका छन् ।
उपनिर्वाचनमार्फत प्रतिनिधिसभा सदस्यमा चुनाव जिताएका मधेस प्रदेशका पूर्वमुख्यमन्त्री सरोजकुमार यादवलाई उनले कुनै स्थान दिएका छैनन् । पदाधिकारीसहित ३१ सदस्य कार्यकारणी समितिमा उनले कहीँ कतै ठाउँ नपाएको देखिन्छ ।
सप्तरी–२ मा प्रतिनिधिसभा सदस्यको चुनावमा जनमत पार्टीका अध्यक्ष डा. सीके राउतसँग उपेन्द्र यादव हारेका थिए । बारा–२ बाट निर्वाचन जिताउन अहमभूमिका खेलेका पूर्वमुख्यमन्त्री सरोजकुमार यादवले उपेन्द्र यादवलाई जिताउन निकै ठूलो गुण लगाएका थिए । तर, अहिले पार्टीभित्रै उपेन्द्र यादवले उनीमाथि अन्याय गरेको नेताहरू बताउँछन् । पूर्वमुख्यमन्त्री यादवले पदाधिकारीदेखि कार्यकारिणी समितिसम्म कतै ठाउँ पाएका छैनन् ।
‘पार्टीको पदाधिकारी, कार्यकारिणी समिति चयन गर्न सबै अधिकार अध्यक्ष उपेन्द्र यादवलाई हामी दिएका थियौं । उहाँले पार्टी भित्र जिम्मेवारीको वर्गीकरण गर्नुभएको छ । हामी आफ्नो अधिकार उहाँलाई दिएपछि सन्तुष्ट हुनै पर्छ नि ! मन पराएको सबै पद कहाँ पाइन्छ र ? ’, पार्टी प्रवक्ता मनिष सुमन हाँस्दै भन्छन्, ‘मैले नामावली बनाएको भए सच्चाइदिन्थेँ । अध्यक्षज्यूले धेरै मेहनत र सन्तुलन मिलाउन जीवनको गम्भीर मोडमा यो निर्णय गर्नुभएको छ ।’
प्रतिक्रिया दिनुहोस !
