विराटनगर : मोरङमा मिनी ट्रकको साइकललाई ठक्कर दिँदा दुर्घटना भएको छ। दुर्घटनामा परेर सोमबार साइकल यात्रीको मृत्यु भएको छ।
पूर्व–पश्चिम लोकमार्गअन्तर्गत उर्लाबारी नगरपालिका–३ नयाँ मंगलबारेमा दुर्घटना भएको हो। प्रहरीका अनुसार ग्यास बोकेर पश्चिमतर्फ आउँदै गरेको को १ क ७१० नम्बरको मिनी ट्रकले पश्चिमतर्फ नै आउँदै गरेको साइकललाई साँझ ६:१० बजेतिर ठक्कर दिएको थियो।
दुर्घटनामा परेर साइकल यात्री उर्लाबारी–२ का अन्दाजी ६० वर्षीय गोकल भट्टराईको छ। ट्रकको ठक्करबाट गम्भीर घाइते भएका भट्टराईलाई उपचारका लागि उर्लाबारीस्थित अरनिको अस्पताल पुर्याउनसाथ चिकित्सकले मृत घोषित गरेको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए।
उनका अनुसार दुर्घटनालगत्तै ट्रक र चालक सुनसरीको इटहरी उपमहानगरपालिका–१६ का २६ वर्षीय श्रवणकुमार चौधरीलाई नियन्त्रणमा लिएर अनुसन्धान सुरु गरिएको छ। साइकलले बाटो काट्ने क्रममा दुर्घटना भएको प्रारम्भिक अनुसन्धानबाट पत्ता लागेको बस्नेतले बताए।
प्रतिक्रिया दिनुहोस !
