धनकुटा : धनकुटाका स्थानीय तहमा करिब १ अर्ब ७ करोड रुपैयाँ बेरुजु देखिएको छ। महालेखा परीक्षकको कार्यालयले सार्वजनिक गरेको आर्थिक वर्ष २०७९/८० को अन्तिम लेखापरीक्षण प्रतिवेदनमा जिल्लाका सात स्थानीय तहको बेरुजु रकम १ अर्ब ६ करोड ९९ लाख ५३ हजार रुपैयाँ देखिएको हो ।
आर्थिक वर्ष २०७८/७९ मा स्थानीय तहको बेरुजु ९२ करोड २० लाख ८९ हजार रुपैयाँ रहेको थियो । तर आर्थिक वर्ष २०७९/८० मा १४ करोड ७८ लाख ६४ हजार रुपैयाँ थप भएको छ । महालेखाको प्रतिवेदनअनुसार सबैभन्दा बढी बेरुजु रकम महालक्ष्मी नगरपालिकामा रहेको छ भने सबैभन्दा कम बेरुजु सहिदभूमि गाउँपालिकामा छ ।
प्रतिवेदनमा उल्लेख भएअनुसार महालक्ष्मीको बेरुजु ३० करोड ७ लाख २३ हजार रुपैयाँ रहेको छ । आर्थिक वर्ष २०७८/७९ मा २७ करोड २५ लाख ९२ रहेकोमा आर्थिक वर्ष २०७९/८० मात्रै २ करोड ८१ लाख ३१ हजार रुपैयाँ थप भएको छ ।
सबैभन्दा कम रहेको सहिदभूमि गाउँपालिकाको ६ करोड ८९ लाख ३२ हजार रुपैयाँ बेरुजुमध्ये आर्थिक वर्ष २०७९/८० मा १ करोड ९३ लाख १९ हजार ९ सय ७१ थप भएको हो । आर्थिक वर्ष २०७८/७९ मा गाउँपालिकाको कुल बेरुजु ४ करोड ९६ लाख १३ हजार रहेको प्रतिवेदनमा छ ।
धनकुटा नगरपालिकाको कुल बेरुजु रकम २२ करोड ७४ लाख ९६ हजारमध्ये २ करोड ५८ लाख ८० हजार रुपैयाँ आर्थिक वर्ष २०७९/८० मा थप भएको हो । आर्थिक वर्ष २०७८/७९ मा २० करोड १६ लाख १६ हजार रुपैयाँ बेरुजु रहेको थियो ।
त्यस्तै छथरजोरपाटी गाउँपालिकाको बेरुजु रकम आर्थिक वर्ष २०७९/८० मा २ करोड ८० लाख २९ हजार रुपैयाँ थप भएर १५ करोड ३० लाख २३ हजार ७२ रुपैयाँ पुगेको छ । आर्थिक वर्ष २०७८/७९ मा उक्त गाउँपालिकाको बेरुजु रकम १२ करोड ४९ लाख ९४ हजार रुपैयाँ रहेको थियो । पाख्रिबास नगरपालिकामा बेरुजु रकम १४ करोड १८ लाख ९ हजार रुपैयाँ पुगेको छ । आर्थिक वर्ष २०७८/७९ मा ११ करोड ८४ लाख ५३ हजार रुपैयाँ बेरुजु रहेको थियो ।
आर्थिक वर्ष २०७९/८० मा २ करोड ३३ लाख ५६ हजार रुपैयाँ बेरुजु थप भएको प्रतिवेदनमा उल्लेख छ । साँगुरीगढी गाउँपालिकामा बेरुजु रकम १० करोड २७ लाख १ हजार रुपैयाँ रहेको छ । कुल बेरुजु रकममध्ये आर्थिक वर्ष २०७८/७९ सम्म ९ करोड ४० लाख ४२ हजार रुपैयाँ रहेको थियो भने आर्थिक वर्ष २०७९/८० मा ८६ लाख ५९ हजार रुपैयाँ बेरुजु रकम थप भएको छ ।
त्यस्तै, चौबिसे गाउँपालिकामा आर्थिक वर्ष २०७९/८० मा १ करोड ४४ लाख ८८ हजार ९७ रुपैयाँ थप भई बेरुजु रकम ७ करोड ५२ लाख ६७ हजार रुपैयाँ पुगेको छ । आर्थिक वर्ष २०७८/७९ मा सो गाउँपालिकाको बेरुजु रकम ६ करोड ७ लाख ७९ हजार रुपैयाँ रहेको थियो ।
एकै वर्षमा थपियो करिब १५ करोड बेरुजु
जिल्लाको स्थानीय तहमा एकै आर्थिक वर्षभरिमा करिब १५ करोड रुपैयाँ बेरुजु थप भएको छ । महालेखाको प्रतिवेदनमा उल्लेख भएअनुसार आर्थिक वर्ष २०७९/८० को एक वर्षको अवधिमा जिल्लाको सात स्थानीय तहमा १४ करोड ७८ लाख ६४ हजार रुपैयाँ बेरुजु थप भएको छ । उक्त आर्थिक वर्षमा सबैभन्दा बढी महालक्ष्मी नगरपालिकामा २ करोड ८१ लाख ३१ हजार र सबैभन्दा कम साँगुरीगढी गाउँपालिकामा ८६ लाख ५९ हजार रुपैयाँ बेरुजु रहेको प्रतिवेदनमा छ ।
स्थानीय तहहरूको प्रारम्भिक प्रतिवेदनबाट देखिएको बेरुजु रकम १६ करोड ५६ लाख ७८ हजार मध्ये १ करोड ७८ लाख १३ हजार रुपैयाँ फस्र्योट गरेका थिए ।
बेरुजुको कुल रकममध्ये ३ करोड १४ लाख ३० हजार रुपैयाँ असुल गर्नुपर्ने बेरुजु छ । त्यस्तै ६ करोड २० लाख ८१ हजार रुपैयाँ अनियमित भएको प्रतिवेदनमा उल्लेख छ । प्रमाणका कागजात पेस नभएको कारण ६ करोड ८९ लाख ७३ हजार रुपैयाँ बेरुजु आएको छ । ३१ लाख ९२ हजार ८ सय ९४ रुपैयाँ पेस्की बेरुजु देखिएको छ ।
प्रतिक्रिया दिनुहोस !
