विराटनगर : विराटनगरको कोशी अस्पतालमा क्यान्सर रोगको थप सेवा विस्तार गर्ने सम्झौता भएको छ। सेवा विस्तारका लागि भक्तपुरको क्यान्सर अस्पतालसँग बिहीबार सम्झौता भएको छ।
स्वास्थ्य तथा जनसंख्यामन्त्री प्रदीप पौडेल र स्वास्थ्य मन्त्रालयका सचिव डाक्टर रोशन पोखरेलको उपस्थितिमा भक्तपुर क्यान्सर अस्पतालका निर्देशक उज्जवल चालिसे र कोशी अस्पतालका निमित्त मेडिकल सुपरिटेन्डेन्ट डाक्टर रविनराज सिंहले सम्झौता पत्रमा हस्ताक्षर गरेका छन्।
भक्तपुर क्यान्सर अस्पतालले नियम अनुसार सेवा उपलब्ध गराउने जनशक्तिलाई यातायात, खाजालगायत खर्चको लागि आवश्यक बजेटको व्यवस्था गर्ने सम्झौताको पहिलो बुँदामा उल्लेख छ। त्यस्तै, भक्तपुर क्यान्सर अस्पतालले सेवा सञ्चालन गर्दा आवश्यक जनशक्तिको व्यवस्था आफ्नो संस्थाको नियमित सेवा प्रभावित नहुने गरी मिलाउने भएको छ।
महिनाको कम्तीमा एकपटक सेवा सञ्चालन गर्नुपर्ने र विस्तारित सेवामा बहिरंग अन्तरंग एवं उपचारसमेत समेटेर सेवा गर्नुपर्ने उल्लेख छ। कोशी अस्पतालले क्यान्सर रोगको विस्तारित सेवा सञ्चालन गर्न आवश्यक वातावरण निर्माण गर्ने, सेवाग्राहीलाई विस्तारित सेवा बारे सूचना, कार्यतालिका र सेवा विवरण बारे जानकारी गराउने सम्झौता पत्रमा उल्लेख छ।
सम्झौता पत्र हस्ताक्षर कार्यक्रममा बोल्दै कोशी अस्पतालका क्यान्सर रोग विशेषज्ञ डाक्टर रगिन कठेतले २०७२ साल कात्तिकदेखि सुरु गरिएको क्यान्सर रोगको सेवा विस्तार गरेर अहिले दैनिक ओपीडी सेवा, इन्डोर सेवा, डे–केयर केमोथेरापीसहितको ५ बेड सञ्चालनमा रहेको बताए। अस्पतालमा ब्रेस्टको सर्जरी, पेट तथा आन्द्राको सर्जरी, मृगौला तथा प्रोस्टेटको सर्जरी, छालाको क्यान्सर सर्जरी सञ्चालनमा छन्।
उनले १० वर्षदेखि क्यान्सर रोगको सेवा सुरु गरे पनि अहिले विशेषज्ञ क्यान्सर सेवाको अभाव रहेको बताए। क्यान्सरका बिरामीले अबदेखि भरतपुर र काठमाडौं जानुपर्ने बाध्यता हट्ने भएपनि सरकारले क्यान्सर रोग पीडितलाई दिने भनेको रकम नदिएको डा. कठेतको भनाइ छ। प्रदेश सरकारले क्यान्सरका १ जना बिरामीलाई १ लाख रुपैयाँका दरले रकम दिँदै आएको थियो।
‘२०८० साल फागुनसम्ममा ४ हजार बिरामीले ४० करोड रुपैयाँ पाउन सकेका छैनन्,’ डा. कठेतले भने, ‘फागुन पछाडि त सरकारले फारम नै लिन बन्द गरेकाले समस्या समाधान गर्न स्वास्थ्य मन्त्रालयको ध्यान आकर्षण गराउँछु।’ स्वास्थ्य तथा जनसंख्यामन्त्री प्रदीप पौडेलले डेढ महिनाको अवधिमा बिमालाई प्रभावकारी बनाएर एकद्वार प्रणालीबाट काम गर्ने गरी सरकार अघि बढिरहेको स्पष्ट पारेका छन्।
प्रतिक्रिया दिनुहोस !
