‘स्टार्टअपसँग अन्नपूर्ण’ अभियानको क्यानडा पार्टनरमा क्यानडा नेपाल चेम्बर अफ कर्मश महासंघ

काठमाडौं : युवा उद्यमीहरूले सुरु गरेको स्टार्टअप व्यवसायको प्रवर्द्धन गर्न अन्नपूर्ण मिडिया नेटवर्कले सुरु गरेको ‘स्टार्टअपसँग अन्नपूर्ण’ अभियानको इन्टनेशनल पार्टनरमा क्यानडाको  क्यानडा नेपाल चेम्बर अफ कर्मश महासंघ रहने भएको छ । आइतवार  भएको एक समारोहमा उक्त सम्झौता भएको हो । 

सम्झौतापत्रमा ‘स्टार्टअपसँग अन्नपूर्ण’ अन्नपूर्ण मिडिया नेटवर्कका महाप्रबन्धक मनोज बस्नेत र क्यानडा नेपाल चेम्बर अफ कर्मश महासंघ क्यानडाका महासचिव गोकर्ण लामिछानेले हस्ताक्षर गरेका छन् । ‘स्टार्टअपसँग अन्नपूर्ण’ अभियानमा जोडिएका स्टार्टअप कम्पनीहरूको प्रोडक्टलाई क्यानडामा बजारीकरण गर्न उनीहरूलाई हौसला बढाउनका लागि महासंघले सघाउनेछ ।

‘यो सहकार्यले क्यानडा र नेपालबीचको व्यापार सम्बन्ध प्रवर्द्धन र आर्थिक विकासलाई बढवा दिन महत्त्वपूर्ण भूमिका खेल्नेछ’ क्यानडा नेपाल चेम्बर अफ कर्मश महासंघ क्यानडाका अध्यक्ष विजय पौडेलले भने, ‘नेपाल र क्यानडाका नयाँ व्यावसायीलाई विश्वव्यापी बजारमा पुग्ने र दिगो वृद्धि हासिल गर्न लाभदायी हुनेछ ।’

‘स्टार्टअपसँग अन्नपूर्ण’ अभियानको लागि एफसीएनसीसीले क्यानडामा स्थानीय साझेदारको रूपमा काम गर्नेछ। यो अभियानले ब्रान्डिङ, मार्केटिङ र अन्तर्राष्ट्रिय साझेदारीका अवसरहरूलाई सहजीकरण गरेर युवा उद्यमीहरूद्वारा स्थापित स्टार्टअप व्यवसायहरूलाई प्रवर्द्धन गर्ने लक्ष्य राखेको छ ।  

यो अभियानमा  नेटवर्कका सबै प्लेटफर्महरू सहभागी हुनेछन् । नेटवर्कले हाल नेपाली संस्करण अन्नपूर्ण पोस्ट दैनिक, अंग्रेजी द अन्नपूर्ण एक्सप्रेस डेली, रेडियो अन्नपूर्ण नेपाल ९४ मेगाहर्ज, अनलाइन न्यूज पोर्टल अन्नपूर्ण पोस्ट डट कम, एपीवान टेलिभिजन लगायतका मिडिया प्लेटफर्महरू सञ्चालन गर्दै आइरहेको छ ।