‘स्टार्टअपसँग अन्नपूर्ण ’अभियानको एग्रिकल्चर साझेदारमा मुक्तिनाथ कृषि कम्पनी

काठमाडौं : युवा उद्यमीहरूले सुरू गरेको स्टार्टअप व्यावसायको प्रवर्द्धन गर्न अन्नपूर्ण मिडिया नेटवर्कले सुरू गरेको ‘स्टार्टअपसँग अन्नपूर्ण’ अभियानको एग्रिकल्चर साझेदारमा मुक्तिनाथ कृषि कम्पनी लिमिटेड रहने भएको छ ।  

सोमबार मुक्तिनाथ कृषि कम्पनी लिमिटेडको बसुन्धारास्थित केन्द्रीय कार्यालयमा भएको एक समारोहमा उक्त सम्झौता भएको हो । सम्झौतापत्रमा अन्नपूर्ण मिडिया नेटवर्कका महाप्रबन्धक मनोज बस्नेत र मुक्तिनाथ कृषि कम्पनी लिमिटेडका डिजिएम रामशरण तिमल्सिनाले हस्ताक्षर गरेका हुन् । 

मुक्तिनाथ मुलुककै पहिलो कृषि कम्पनी हो । ‘समृदिको आधार कृषि,कृषिको आधार प्रविधि’भन्ने नारासहित स्थापित यस कम्पनीले कृषि मूल्य श्रृखंला व्यवस्थापनसँग सम्बन्धित सबै क्षेत्रमा आपसी हितका लागि सहजीकरण गर्दै आइरहेको छ ।

‘अन्नपूर्ण मिडिया नेटवर्कले सञ्‍चालन गरेको ‘स्टार्टअपसँग अन्नपूर्ण’ अभियानमा कृषि साझेदारको रुपमा हामी जोडिन पाउँदा खुसी लागेको छ,'मुक्तिनाथ कृषि कम्पनी लिमिटेडका प्रबन्ध निर्देशक भरतराज ढकालले भने, ‘युवाहरूलाई कृषि क्षेत्रको उद्यम र उद्योगमा जोडन सक्रिय रुपमा लाग्नेछौं ।’

यो अभियानमा  नेटवर्कका सबै प्लेटफर्महरू सहभागी हुनेछन् । नेटवर्कले हाल नेपाली संस्करण अन्नपूर्ण पोस्ट दैनिक,अंग्रेजी द अन्नपूर्ण एक्सप्रेस डेली, रेडियो अन्नपूर्ण नेपाल ९४ मेगाहर्ज, अनलाइन न्यूज पोर्टल अन्नपूर्ण पोस्ट डट कम,एपीवान टेलिभिजनलगायतका मिडिया प्लेटफर्महरू सञ्चालन गर्दै आइरहेको छ ।