सर्वोच्चको फैसलाले जनता मारमा परे, पुनरावलोकनमा जानुपर्छ : सांसद पन्त

काठमाडौं : नेकपा एमालेका सांसद रघुजी पन्तले सर्वोच्चको फैसलाले जनता मारमा परेको पुनरावलोकनमा जानुपर्ने बताएका छन् । सोमबार प्रतिनिधिसभाको बैठकमा अदालतको फैसलामा  टिप्पणी गर्न मन नहुँदा नहुदै पनि उक्त फैसलाले जनता मारमा परेको पुनरावलोकनमा जानुपर्ने बताएका हुन्। 

जनताले पुनरावलोकनमार्फत न्यायपूर्ण फैसला हुने अपेक्षा गरेको उनको भनाई छ । पन्तले सरकार पुनरावलोकनमा नजाने हो भने जनताको सम्पत्तिमाथिको हक हनन हुने जिकिर गरे।

पन्तले जनताको हितमा कदम चाल्न काठमाडौं महानगर प्रमुख बालेन शाहलाई सुझाव दिए । उनले भने,‘उहाँको सूचनाले हलचल मच्चाएको छ । कतिपय कुराबाट पछि हट्नुभएको हो कि जस्तो पनि भएको छ । कसैसँग सल्लाह नगरी जारी गरेको सूचनाले हो।’ 

उनले महानगरको आदेशका नाममा जनतालाई त्रसित बनाउन नहुने उल्लेख गरे । महानगरले गर्ने राम्रा काममा सदैव आफूहरुको साथ रहने उनको भनाई छ। उनले भने,‘जनताको मनस्थिति, मनोभावना र उनीहरुलाई परेको अन्यायलाई ध्यानमा राख्दै सरकार तुरुन्तै पुनरावलोकनमा जाओस् । सर्वोच्च अदालतलाई विनम्रतापूर्वक आग्रह गर्न चाहन्छु– उपत्यका जनताले पुनरावलोकनमार्फत न्यायपूर्ण फैसला हुन्छ भन्ने अपेक्षा गरेका छन् ।’