परासी : नवलपरासीका भारतीय सीमावर्ती नाकाबाट भइरहेको लसुन तस्करी रोकिन सकेको छैन । नेपालबाट भारततर्फ दैनिकजसो चाइनिज लसुनको तस्करी हुने गरेको हो । तस्करी कार्य बढेको गुनासो आएपछि सोमबार दिउँसो राजस्व अनुसन्धान कार्यालय बुटवलको टोलीले सीमावर्ती नाकाको एक गोदाममा छापा मार्दा करिब २८ लाख बराबरको ११ हजार केजीभन्दा बढी लसुन फेला पारेको छ ।
त्यसको अनुसन्धान भइरहेको राजस्व कार्यालयले जनाएको छ । भारतमा महंगोमा बिक्री हुने भएकाले नेपालबाट लसुनको तस्करी बढेको हो । जिल्लाको भूजहवा, बसैया, धर्मपुरलगायतका नाकाबाट लसुन भारतर्फ पठाउने गरिएको छ । भारतमा प्रतिकेजी ३० देखि ४० रुपैयाँ नेपाली महंगोमा बिक्री हुने गरेको व्यवसायीहरूले बताएका छन् ।
सीमावर्ती क्षेत्रको दसगजा नजिकमै रहने गरी कारोबारीहरूले फर्म दर्ता गर्ने गरेका छन् । फर्मका नाउँमा ठूलै गोदाम बनाएर राखेका उनीहरूले लसुनलगायतका सामान राख्ने गरेका हुन् । नेपालबाट खरिद गरेर ल्याउने अधिकांश लसुनको बिल नै बनाएर राख्ने गरिएको छ ।
जसका कारण तस्करी गर्ने उद्देश्यले ल्याएका सामानलाई समेत बिल बिजक भएका कारण पक्राउ गर्न कानुनी झन्झट हुँदा समस्या भएको जिल्लास्थित सुरक्षा अधिकारीको भनाइ छ । त्यसरी गोदाममा राखेका लसुनलाई कारोबारीहरूले रातको समयमा ५० मिटर दुरीमा रहेको दसगजा पार गराएर भारततर्फ पठाउने गरेको बताइएको छ ।
सीमावर्ती नाकाका गोदाममा लसुन रहेको जानकारी पाए पनि बिल बिजक भएकाले पक्राउ गर्न समस्या भएको जिल्ला प्रहरी कार्यालय नवलपरासीका प्रमुख एसपी ज्ञानेन्द्र फुयालले बताए । ‘सामान आउँदैछ भन्ने जानकारी आउँछ,चेकजाँच गर्दा बिल बिजक हुन्छ । दसगजा नजिक फर्मसम्म लैजान कानुनी रुपले नै पाउने भएकाले पक्राउ समस्या भएको हो ,'एसपी फुयालले भने ।
कहिले काही जाने राजस्व कार्यालयको टोलीले समेत बिल बिजक भएको बहानामा छाड्ने तर,खरिद बिक्री कहाँ गरेको हो भन्नेमा कागज पत्र हेर्ने नगरेका कारण पनि तस्करी कार्यले प्रोत्साहन पाएको बताइएको छ । ‘ आएको सामान कुन ठाउँमा गयो भनेर काटिएको बिल र खरिद बिक्री खाता हेरे प्रष्ट हुन्छ । तर,त्यसको खोजी नगर्दा छापा मार्न गएका टोलीहरू माथि नै आशंका गर्ने संभावना बढेको छ ,'एक प्रहरी अधिकृतले भने ।
फर्म राख्ने अनुमति दिँदा कम्तीमा दसगजाबाट कम्तीमा ५ सय मिटरदेखि १ किलोमिटर पर राख्न दिने व्यवस्था गर्न सके अवैध रुपमा जान सक्ने सामान बरामद गर्न सहज हुने एसपी फुयालको भनाइ छ । सशस्त्र प्रहरी बल नं. २६ गण नवलपरासीका प्रमुख एसपी प्रकाश वाग्लेले गोदाममा छापा मार्ने र बिल बिजक हेरेर कारबाही गर्ने अधिकार राजस्व कार्यालयलाई भएकाले आफूहरूले त्यसो गर्न नसकिएको बताउँछन् ।
‘शंका लागेर राजस्व र भन्सार कार्यालय पठाउँदा बिल बिजक दुरुस्त भएको भन्दै फेरि फिर्ता पठाउने गरेको छ । यसले चोरी निकासी हुन्छ भन्ने जानकारी हुँदाहुँदै पनि समस्या भएको छ ,’सशस्त्र प्रहरीका एसपी वाग्लेले भने । जिल्लाका सीमावर्ती क्षेत्रका दसगजा नजिक करिब २० बढी फर्महरू दर्तामा रहेको र त्यही फर्मको नाउँमा भारततर्फ अवैध रुपमा सामान पठाउने गरेको बताइएको छ ।
२८ लाख बराबरको लसुन नियन्त्रणमा
यसैबीच जिल्लाको सीमावर्ती बसैया नाकाबाट राजस्व अनुसन्धान कार्यालय बुटवलको टोलीले गोदाममा छापा मारेर लसुन नियन्त्रणमा लिएको छ । नेपाल प्रहरी,सशस्त्र प्रहरी र भन्सार कार्यालयको सहयोगमा राजस्व कार्यालयको टोलीले प्रतापपुर गाउँपालिका–५ बसैयाको एक गोदाममा सोमबार छापा मारेको हो ।
छापा मार्ने क्रममा स्थानीय अजय हरिजनको गोदामबाट करिब २८ लाख बराबरको १ सय ११ क्विन्टल (११ हजार १ सय केजी) लसुन फेला परेको राजस्व कार्यालयका शाखा अधिकृत मनोज सइनीले बताए । बिल बिजक नभएको अवस्थामा फेला परेको लसुनमा २० केजीका ५१० बोरा र ३० केजीका ३१ बोरा रहेको शाखा अधिकृत सइनीले जानकारी दिए । ‘हामीले बिल बिजक मागेका छौं । अडिटरले लगेकाले पछि ल्याउँछु भनेका छन् । बिहीबारभित्र कागज पत्र लिएर कार्यालयमा उपस्थित हुन लिखित कागज गराएर आएका छौं ,'सइनीले भने ।
बिल बिजक नभए कानुनअनुसार कारबाही प्रक्रिया अघि बढाउने उनको भनाइ छ । अडिरले बिल लगेको बहानामा छाडिएको लसुनलाई कारोबारीहरूले कागज पत्र बनाएर ल्याउन सक्ने आशंकका समेत गरिएको छ । चाडपर्व नजिकिएसँगै पछिल्लो पटक सीमावर्ती नाकाबाट चिनी र लत्ताकपडाको तस्करी कार्य समेत बढेको स्थानीयले बताएका छन् ।
प्रतिक्रिया दिनुहोस !
