एप्पलले आइफोनको नयाँ सिरिज सार्वजनिक गरेको छ । यस वर्ष एप्पलले अमेरिकाको क्युपर्टिनोस्थित एप्पल पार्कको स्टिभ जब्स थिएटरमा नयाँ सिरिज सार्वजनिक गर्ने कार्यक्रम आयोजना गरेको थियो ।
यस कार्यक्रमलाई 'इट्स ग्लोटाइम' नाम दिइएको छ। कार्यक्रममा एप्पल वाच सिरिज–१०, एप्पल वाच अल्ट्रा २, एयरपड्स–४, एयरपड्स म्याक्स , आइफोन–१६, आइफोन १६ प्लस, आइफोन–१६ प्रो र आइफोन–१६ प्रो म्याक्स लन्च गरिएको थियो ।
आइफोन-१६ सिरिजका विशेषता
नयाँ सिरिजमा आर्टिफिसियल इन्टेलिजेन्सका धेरै सुविधाहरूसँगै एप्पल इन्टेलिजेन्सको प्रयोग गरिएको छ । टिम कुकले यसलाई नयाँ युगको सुरुवात भनेका छन् ।
एप्पल इन्टेलिजेन्स भने केही देशहरूमा मात्र बिटा संस्करणमा उपलब्ध हुने जनाइएको छ।
आइफोन–१६ को स्क्रिन साइज ६.१ इन्च छ भने आइफोन–१६ प्लसको स्क्रिन साइज ६.७ इन्च छ ।
आइफोन-१६ प्रोको स्क्रिन साइज ६.३ इन्च र प्रो म्याक्सको साइज ६.९ इन्च छ। आइफोन-१६ प्रो म्याक्स अहिलेसम्मकै ठूलो डिस्प्ले भएको आइफोन हुने उल्लेख गरिएको छ।
क्यामेरा कन्ट्रोल फिचरसँगै नयाँ एक्शन बटन थपिएको छ। चिपसेटको कुरा गर्दा, एप्पल दुई पुस्ता अगाडि बढेको र नयाँ सिरिजमा ए१८ चिपसेट दिएको छ। आइफोन १५ मा ए१६ चिपसेट थियो।
प्रतिक्रिया दिनुहोस !
