काठमाडौं : बुढानीलकण्ठमा घर घडेरी भएका ३३ वर्षीय आशिष देउला हाल प्रहरी हिरासतमा छन् । ४ /५ वटा कम्पनीका सञ्चालक देउला आफ्नै पजेरो चढेर हिँड्थे । दिन बिराएर ठमेलको विभिन्न क्लब, दोहोरी साँझ पुग्नु उनको दैनिकी हो । क्लबमा आउने अन्य युवाहरूले खर्च गरेको पैसासमेत उनी आफैंले तिरिदिन्थे ।
उनीविरुद्ध यही भदौ १८ गते एउटा जाहेरी दर्ता भएको छ । जाहेरी अनुसार उनले गरेको कसुर सुन्दै डरलाग्दो छ । आफूलाई रिस उठेका व्यक्ति र बदला लिन पर्ने व्यक्तिहरूलाई उनले तातो आइरनले डाम्ने गरेको प्रहरीले जनाएको छ। पानी तताउने विद्युतीय रड तताएर शरीरभरि हिर्काउने गर्थे ।
जिल्ला प्रहरी परिसर काठमाडौंमा उनलाई भेट्दा आकासी रंङको सुकिलो टिसर्टमा थिए । आफूलाई निर्दोष सावित गर्न निकै कोसिस गरिरहेका थिए । आफूलाई फसाउन खोजेकाले बदला लिन आइरनले डामेको बताइरहेका थिए । रिस उठेको बेलामा तातो रडले हिर्काएको बताइरहेका देउलालाले आफ्नो कर्तुत भनिरहँदा अलिकति पनि असहज अथवा पश्चताम अनुभव गरेको अनुहारमा देखिएन ।
जिल्ला प्रहरी परिसर काठमाडौंका प्रवक्ता नवराज अधिकारीका अनुसार ३३ वर्षका देउलाविरुद्ध शरीर बन्धक तथा ज्यान मार्ने उद्योग गर्न नहुने कसुरमा जाहेरी दर्ता गरिएको छ । विशाल पोडेले दिएको जाहेरीमा देउलाले रिस साँध्नको लागि कतिसम्म क्रुर यातना दिने रहेछन् विवरणमा उल्लेख छ ।
प्रहरीका अनुसार जाहेरवाला र आरोपित देउलाको समूहबीच ठमेलस्थित सेनेट क्लबमा भेट भइ चिनजान भएको थियो । उक्त समयमा देउला ६/७ जनाको समूहमा क्लवमा जाने गर्थे । क्लब जाने, मदिरा खाने र रंग रमाइलो गर्ने क्रममा जाहेरवाला र देउलाको समुहबीच विवाद बढेको थियो । यही विवादका बीच गत भदौ ७ गते राती देउलाको समूहले बा७च ६४६१ नम्बरको पजेरोमा राखेर पीडितलाई क्रुर यातना दिएका थिए ।
प्रहरीमा दर्ता भएको जाहेरीमा देउलाले पीडितलाई काठमाडौं १२ सवलबाहलस्थित आशिषको आफन्तको घरमा लगेर क्रुर यातना दिएको उल्लेख छ । जाहेरी अनुसार पानीको पाइप जोड्नको लागि प्रयोग हुने फलामको आइरन बिजुलीमा जोडी पीडित विशालको ढाडमा सबैतिर डामेका थिए । कोठामा थुनेर मार्ने नियतले आइरनले डामेका उनी पीडितले पीडाले चुच्चाउँदा रमाइलो लाग्यो, मजा आयो भन्दै खुसी हुने गर्थे । उनीहरूले विशाललाई बेहोस बनाएर टेकु दोभानमा लगेर फालिदिएका थिए ।
काठमाडौं प्रहरी परिसरका प्रवक्ता नवराज अधिकारी भन्छन्, 'देउलाको आपराधिक मनस्थिति अलि असामान्य छ । उनले जाहेरवालालाई मात्रै नभएर अन्यलाई समेत चरम यातना दिएको खबर सुनेका छौं । यसबारे प्रहरीले अनुसन्धान गरिरहेको छ ।'
करिब ३ घण्टासम्म बन्धक बनाएर आशिषसहितका ४ जना मिलेर डामेको प्रहरीको अनुसन्धानबाट थाहा भएको छ । धनी बाबुका छोरा आशिष रात्री क्लबको नियमित ग्राहक हुन् । सिनेट, ओम्निया र एलओडीमा उनी निरन्तर जान्छन् ।
प्रहरीले आशिषसँगै अन्य ३ जनालाई नियन्त्रणमा लिएको छ । देउलाको समूहमा २७ वर्षीय राजेन्द्र घले, उदयपुरका २२ वर्षीय ओजस्वी तामाङ र चितवन घर भएका २२ वर्षका साजन गुरुङ आबद्ध छन् ।
सामाजिक सञ्जालका ‘सुगर ड्याडी’
सम्पन्न परिवारका आशिष सामाजिक सञ्जालमा ‘सुगर ड्याडी’का नामले चिनिन्छन् । यही नाममा उनले विभिन्न भिडियो पोष्ट गरेका छन् । बुढ्यौली झल्कने पुरुषको नकाब लगाएर उनी रात्रिकालीन क्लब धाउने गर्थे । इन्स्टाग्राम र टिकटक अकाउन्टमा उनले पैसाको नोट उडाउँदै गरेको, पैसाको ओछ्यानमा सुतेको भिडियो बनाएर पोष्ट गरेका छन् । १२ कक्ष पास गरेका आशिष क्लबमा जाँदा उनी ३० देखि ४० हजार रुपैयाँ उडाउँछन् । कहिले दैनिक रूपमा त कहिले हप्ताको ३ दिन क्लब जाने गरेको उनले स्वीकार गरेका छन् ।
प्रहरी हिरासतमा भेटिएका आशिषले पैसा उडाउनु आफ्नो सोख भएको बताएका थिए । उनी भन्छन्, ‘ऋण लिएको बेलामा पैसा साथमा हुन्छ । यही बेलामा भिडियो बनाउने गरेको छु । प्याङ्क गर्नु, अभिनय गर्नु र क्यारिकेचर गर्नु मेरो रुची हो । उनको ‘सुगर ड्याडी–५० मी’ नामको टिकटक आइडी छ ।'
प्रतिक्रिया दिनुहोस !
