जोमसोम : पछिल्लो समय हिमालपारिको सडक समृद्ध बन्दै छ । उत्तर/दक्षिण जोड्ने राष्ट्रिय गौरवको कालिगण्डकी करिडोर (बेनी-जोमसोम-कोरला) सडक अन्तर्गत जोमसोम-कागबेनी कालोपत्रे सडक अन्तिम चरणमा पुगेको छ । २०७८ साल असोज ४ गते रौटाहा आत्रेय सारस जेबीसँग २८ करोड १४ लाख लागतमा ठेक्का सम्झौता भएको (जोमसोम-कागबेनी) कालोपत्रे सडक निर्माण अन्तिम चरणमा पुगेको आयोजनाले उल्लेख गरेको छ ।
उत्तरी चीनको स्वशासित क्षेत्र तिब्बतसँग सीमाना जोडिएको कोरलानाका र हिन्दु तथा बौद्धमार्गीहरूको साँझा धार्मिक तीर्थस्थल मुक्तिनाथ पहुँचमार्ग जोड्ने जोमसोम-कालोपत्रे सडक निर्माणका लागि हस्तान्तरण भइसकेको ग्राभेल सडकमा कालापत्रे तथा सडक स्तरोनति गर्न ३ वर्षअघि संघीय सरकार अन्तर्गत भौतिक पूर्वाधार मन्त्रालयले निर्माण कम्पनीसँग ठेक्का सम्झौता गरेको थियो । यो नै जोमसोमदेखि माथि उत्तर भेकमा आयोजनाको पहिलो कालोपत्रे सडक निर्माण हो ।
कोरला सडक आयोजनाका सूचना अधिकारी विष्णु चापागाईंका अनुसार निर्माणाधीन जोमसोम-कागबेनी कालोपत्र सडकको काम अन्तिम चरण पुगेको बताए । जोमसोम-कागबेनी कालोपत्रे सडकको सम्झौता म्याद २ वर्ष तोकिएकोमा त्यसपछि आयोजनाले थप १ वर्ष म्याद थपेको थियो । जोमसोम-कागबेनी १३ किमी कालोपत्रे सडक तथा स्तरोन्नतिको पछिल्लो भौतिक प्रगति ९५ प्रतिशत र वित्तीय प्रगति ९० प्रतिशत पूरा भइसकेको सूचना अधिकारी इन्जिनियर चापागाईंको भनाइ छ । चापागाईंका अनुसार कालोपत्रे सडकको काम करिव-करिव पूरा भइसकेको र अहिले सडकमा सडक मार्किङका लागि रंगरोगन, सडक रेलिङ र साइनबोर्ड टास्ने काम भइरहेको बताए । जोमसोम-कागबेनी कालोपत्रे सडकको काम भदौ पहिलो पटक थपिएको समयअवधिभन्दा अगावै सम्पन्न हुने जनाए । यता निर्माण कम्पनीले एक साता भित्रै १३ किमी कालोपत्रे सडक निर्माणको काम सम्पन्न हुने बताएको छ । निर्माण कम्पनीले कागखोला आसपास सडक ग्रोभल भइसकेको र १ किमी दुरीमा कालोपत्रे गर्न बाँकी रहेको जनाएको छ ।
यसअघि ठेक्का सम्झौता भएको सुरुवाती चरणबाटै आन्तरिक समस्याका कारण ढिलासुस्ती गर्दै आइरहेको जोइन निर्माण कम्पनी आत्रेयले काम गर्न नसकेपछि जोमसोम-कागबेनी सडक अलपत्र परेको थियो । निर्माण कम्पनीलाई पटकपटक काममा फर्किन आयोजनाले ताकेता गरेपछि मुख्य जोइनको निर्माण कम्पनी रौटाहा साँढे २ वर्षपछि कालोपत्रे सडक निर्माणको काममा फर्किएको थियो । रोटाहाले अलपत्र परेको निर्माणधीन जोमसोम-कागबेनी सडकलाई तीव्रता दिएसँगै स्थानीय पर्यटन व्यवसायी तथा सरोकारवालाहरू निकै खुसी भएका छन् । लोमान्था गाउँपालिका-५ लोमान्थाङका वडासदस्य छेवाङ रिन्जि आयोजना अन्तर्गत १३ किमी कालोपत्रे सडकमध्ये १२ किमी मुख्य राजमार्ग सडकमा र १ किमी मुख्य राजमार्ग सडकदेखि कागबेनी श्राद्धस्थलसम्म कालोपत्रे सडक विस्तार भइसकेको जनाइईएको छ । मुस्ताङको कागबेनी र ताङ्बे गाउँबीच मध्यभागसम्म कालोपत्रे सडक निर्माण भएको हो ।
जोमसोम-कागबेनी कालोपत्रेका लागि यसअघिको ग्राभेल सडकलाई चौडा गर्ने, कटिङ गर्ने, ग्रेड मिलाउने, मेसिनरी वाल निर्माण र वाल तथा सडकको आवश्यक स्थानमा ड्रेन निर्माण लगायतका कामहरू गर्ने जिम्मेवारी तोकिएको थियो । यसअघि सुरु गरेको आत्रेयले नसकेको काम रौटाहाले ६ महिनामै कालोपत्रे सडक सक्ने गरी फिल्डमा जनशक्ति तथा उपकरण परिचालन गरेको थियो ।
राष्ट्रिय गौरवको सडक अन्तर्गत २०७४ सालमा जोमसोम-कोरला ११० किमी सडकको ७ खण्डमा ग्राभेल सडक स्तरोन्नति सुरु गरिएको थियो । ग्राभेल सडक अन्तर्गत चराङ-छोसेर ठेकेदारको ढिलासुस्तीले गर्दा अन्तिम चरणमा पुगेर रोकिएको छ भने बाँकी ६ खण्ड ४ वर्ष अगावै आयोजनालाई हस्तान्तरण भइसकेको थियो । हस्तान्तरण भइसकेको पहिलो खण्ड जोमसोम-कागबेनी सडकमा ३ वर्षअघि सडक विभागले पहिलो पटक कालोपत्रे ठेक्का आह्वान गरेको थियो ।
आयोजनाले राष्ट्रिय गौरवको सडक अन्तर्गत बेनी-जोमसोम र जोमसोम-कोरला सडकमा गरी करिव ८० किलोमिटर दुरीमा सडक कालोपत्रे सम्पन्न भइसकेको जनाएको छ। जोमसोम-कागबेनी सडक कालोपत्रे भएसँगै मुक्तिनाथ धामसम्म कालोपत्रे सडक सञ्जालले जोडिएको छ । आयोजनाले बेनी-जोमसोम सडकको तेस्रो र चौथो खण्डको करिव ८० प्रतिशत कालोपत्रे सम्पन्न गरेको छ । म्याग्दी खण्डमा पनि आशिंक कालोपत्रे सडकको काम भएका छन्।
राष्ट्रिय गौरवको बेनी-जोमसोम-कोरला सडक बर्सेनि सहज बन्दै जान थालेपछि मुस्ताङ भ्रमण गर्ने पर्यटक, स्थानीय नागरिक, कर्मचारी र व्यापारिक कारोबार गर्ने व्यक्तिहरूलाई निकै सहज हुन पुगेको छ।
प्रतिक्रिया दिनुहोस !
