दार्चुला: जिल्लाको महाकालीका नगरपालिका–७ धापमा रहेको मालिकार्जुन नमुना माध्यमिक विद्यालयमा आज बिहानै तालाबन्दी गरिएको छ । विद्यालयमा अंग्रेजी विषयको शिक्षकको माग गर्दै कक्षा ११ र १२ का विद्यार्थीहरूले विद्यालयको मुल गेटमा तालाबन्दी गरेको विद्यालय स्रोतले जानकारी दिएको छ ।
विद्यालयको मुलगेटमा तालाबन्दी भएपछि अन्य कक्षामा अध्ययन गर्ने विद्यार्थी र अध्यापन गराउने शिक्षकहरू समेत भित्र पस्न सकेका छैनन् । विद्यालयमा तालाबन्दी गरी शिक्षकको माग गर्दै विद्यार्थीहरू सडकमा उत्रिएका छन् ।
किन लगाए विद्यार्थीले स्कुलमा ताला ?
महाकाली नगरपालिका–७ धापमा रहेको मालिकार्जुन नमुना माविमा कक्षा ११–१२ मा अंग्रेजी शिक्षक अभाव भएको ५ महिना भयो । कक्षा ११ र १२ मा अंग्रेजी विषय पढाउने शिक्षक पुस्कर सिंह रैखोला गत चैतमा आधारभूत तह ०५ मा स्थायी नियुक्तिका लागि सिफारिस भएपछि विद्यालयमा शिक्षक अभाव भएको हो ।
शिक्षक अभाव भएपछि २०८१ जेठ ८ गते विद्यालय व्यवस्थापन समितिको बैठक बस्यो । विद्यालय व्यवस्थापन समिति अध्यक्ष देव सिंह धामीको अध्यक्षतामा बसेको बैठकले कक्षा ११ र १२ मा अध्यापनका लागि रिक्त अंग्रेजी राहत दरबन्दीमा शिक्षक पदपूर्ति गर्नका लागि विज्ञापन प्रकाशन गर्न अनुमतिका लागि महाकाली नगरपालिकालाई माग गर्ने निर्णय गर्यो । सोही बमोजिम असार ६ गते महाकाली नगरपालिकाले उक्त विद्यालयलाई माध्यमिक तह कक्षा ११–१२ को अंग्रेजी विषयको राहत शिक्षक नियुक्ती गर्न १५ दिने सूचना प्रकाशन गर्न अनुमति दियो ।
विद्यालय व्यवस्थापन समितिको पुनः असार ३० गते बैठक बसी शिक्षक नियुक्तिका लागि भन्दै साउन १ गतेदेखि लागू हुनेगरी १५ दिने सूचना प्रकाशन गर्ने निर्णय गरी साउन १ गतेको मितिमा सूचना प्रकाशन गर्यो । सोही दिन नै महाकाली नगरपालिकाले शिक्षक भर्ना प्रक्रिया अगाडि नबढाउन विद्यालयलाई पत्राचार गर्दै अर्को पत्र प्राप्त नहुँदासम्म यथास्थितिमा राख्न आदेश दियो ।
त्यही आदेश अहिलेसम्म कार्यन्वयन हुँदा अहिलेसम्म शिक्षक भर्ना गर्न नसकिएको हो ।
प्रतिक्रिया दिनुहोस !
