वीरगन्जमा चार करोड मूल्यको मदिरा र कम्प्युटर पार्टससहित दुईवटा ट्रक प्रहरी नियन्त्रणमा
भदौ २७, २०८१ बिहीबार १२:४१:५५
वीरगन्ज : वीरगन्जबाट प्रहरीले बिलबिजकमा उल्लेख भन्दा बढी मूल्य र परिमाणका करिब ४ करोड रुपैयाँ मूल्यको विदेशी मदिरा र कम्प्युटरका पार्टससहित दुईवटा मालवाहक ट्रक नियन्त्रणमा लिएको छ ।
विशेष सूचनाको आधारमा जिल्ला प्रहरी कार्यालय पर्साबाट खटिएको प्रहरी टोलीले वीरगन्ज महानगरपालिका वडा नम्बर २५ स्थित सडकबाट लु.१ ख. ७५३२ र ना.३ ख. ५४९ नम्बरको मालवाहक ट्रक नियन्त्रणमा लिएको हो ।
वीरगन्जबाट काठमाडौं जाँदै गरेका ती दुवै ट्रकलाई प्रहरीले रोकेर चेकजाँच गर्दा दुवै ट्रकमा बिलबिजक भन्दा बढी मूल्य र परिमाणका विदेशी मदिरा र कम्प्युटरका पार्टस फेला परेपछि सामानसहित दुवै ट्रकलाई नियन्त्रणमा लिइएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक दीपक भारतीले जानकारी दिए ।उक्त ट्रकबाट ३ करोड ९३ लाख ८८ हजार ६३१ रुपैयाँ मूल्यका सामान बरामद गरिएको उनले बताए ।
सामानसहितका दुवै ट्रक अनुसन्धान तथा कारबाहीका लागि बुधबार बाराको पथलैयास्थित राजश्व अनुसन्धान कार्यालयमा पठाइएको प्रहरी नायब उपरीक्षक भारतीले जानकारी दिए ।
प्रतिक्रिया दिनुहोस !
