कालीकोट : कर्णाली राजमार्गअन्तर्गत सुर्खेत-जुम्ला सडक फेरि अवरुद्ध भएको छ । बुधबार बेलुकीको अविरल वर्षापछि पहिरो जाँदा कर्णाली राजमार्ग अर्न्तगत पर्ने कालीकोटको गगनेखोलादेखि हुल्मसम्म करिब १२ किमी सडक अवरुद्ध भएको प्रहरी नायव उपरीक्षक अर्जुन केसीले बताए ।
उनले भने,' पहिरोले शुभकालिका-१ मा पर्ने गगने खोला, एस मोड, काले खोला हुल्मलगायतका ठाउँमा सडक अवरुद्ध भएको छ । सडक अवरुद्ध भएपछि गाडी र यात्रु बाटोमा अलपत्र छन् । सधैँ पहिरो गइरहने गगने खोलामा यतिबेला झन् ठूलो पहिरो गएको छ ।'
स्थानीय नर्जंग मल्लले गगने खोलामा बुधबार बेलुकी नै पहिरो गएर गाडी रोकिएको बताए । उनले भने,' वर्षाले जितेको छहरामा पानी बढेपछि प्रहरी पनि पहिरो गएको ठाउँसम्म पुग्न सकेको छैन ।'
ट्राफिक प्रहरी कार्यालय कालीकोटका इन्चार्ज टोपबहादुर महताराले गगने खोलामा पहिरो गएपछि ठाउँ-ठाउँमा गाडी अलपत्र परेको बताए। उनले वर्षा नरोकिँदासम्म मेसिन पनि जानसक्ने अवस्था नरहेकाले काम गर्न कठिन भएको छ ।
पहिरोले सडक अवरुद्ध भएकाले कर्णाली राजमार्गमा यात्रा गर्नुअघि सडकको अवस्था बुझेर मात्र यात्रा गर्न उनले अनुरोध गरे।
प्रतिक्रिया दिनुहोस !
