बागलुङमा सरकारी गाडी दुर्घटना : घटनास्थलमा रुकुमपूर्वको पुथा उत्तरगंगा गाउँपालिकाको उपाध्यक्षको कागजपत्र फेला

रुकुमपूर्व  : बागलुङमा सरकारी गाडी  दुर्घटना हुँदा तीनजनाको मृत्यु भएको छ ।  एकजना गम्भीर घाइते भएको बुझिएको छ । घाइतेलाई थप उपचारका लागि धौलागिरी अस्पताल पठाइएको प्रहरीले जनाएको छ ।

मध्यपहाडी लोकमार्गअन्तर्गत जिल्लाको गलकोट नगरपालिका–२ नरेठाँटीको भुंखानीमा दुर्घटना भएको गाडी  रुकुमपूर्वको पुथा उत्तरगंगा गाउँपालिकाको भएको खुलेको छ। रा १ झ २०० नम्बर प्लेटको सरकारी गाडी शुक्रबार बिहान दुर्घटनामा परेको हो।

दुर्घटना स्थलमा दुईजना महिला र एकजना पुरूषको शव भेटिएको जिल्ला प्रहरी कार्यालय बागलुङका सूचना अधिकारी तथा प्रहरी निरीक्षक प्रताप पौडेलले जानकारी दिए । घटनामा रुकुमपूर्वको पुथा उत्तरगंगा गाउँपालिकाका उपाध्यक्ष भुपेन्द्रा बुढा परेको  हुनसक्ने आशंका  गरिएको छ । घटनास्थलमा सो गाउँपालिकाका उपाध्यक्ष बुढाको आइडी कार्ड पनि भेटिएको प्रहरीले जनाएको छ।

शुक्रबार  बिहान दुदीलाभाटीका प्रेमबहादुर कार्कीले घाँस काट्न जाने बेला दुर्घटनाग्रस्त जीप र शव देखेपछि प्रहरीलाई खबर गरेका थिए । घटनास्थलमा पुथा उत्तर गंगा गाउँपालिका उपाध्यक्ष भूपेन्द्रा बुढाको आइडी कार्ड पनि भेटिएको छ ।  बाग्लुङ प्रहरीका अनुसार घटनाको थप विवरण खुल्न बाँकी रहेको छ ।