झापा : अस्पतालमा उपचाररत रहेका झापाका एक कैदीबन्दी फरार भएका छन् । भद्रपुर नगरपालिका–५ निवासी २४ वर्षीय जीवन साह फरार भएका हुन् । साहलाई झापा जिल्ला अदालतले १६ वर्षीया बालिकालाई जबरजस्ती करणी मुद्दाको आरोपमा पुर्पक्षका लागि भदौ ५ गते झापा कारागारमा चलान गरेका थिए ।
साह ओमसाई पाथीभरा अस्पताल भद्रपुरबाट आइतबार बिहान ३ बजेर ३७ मिनेटमा फरार भएको अस्पतालको सिसी टिभी क्यामराको फुटेजमा देखिन्छ । साहलाई उनीकी श्रीमतीले स्कुटर चढाएर भगाएको क्यामराको फुटेजमा प्रस्ट देख्न सकिन्छ । निमोनिया भएपछि साहलाई भदौ २५ गते बिहान मेची प्रादेशिक अस्पताल भद्रपुर लगिएको थियो ।
त्यहाँबाट थप उपचारको लागि ओमसाइ पाथीभरा अस्पतालमा रेफर गरिएको थियो । ओमसाइको दोस्रो तलको दुई नम्बर क्याबिनमा साह उपचारका लागि बसेका थिए । उनको सुरक्षाका लागि अस्पतालमै सहायक हवलदार र प्रहरी जवान गरी दुई जना सुरक्षाकर्मी खटाइएको थियो ।
साह फरार भएको बेला अस्पतालमा प्रहरीसँग लफडा परेको थियो । दुई प्रहरीमध्ये एकजनाले मादक पदार्थ सेवन गरेर एक नम्बर क्याबिन ढकढकाएपछि लफडा भएको थियो । सोही मौका छोपी साह फरार भएको अस्पताल स्रोतले जनाएको छ ।
साह फरार हुँदा हतकडी लगाएको थिएन । उनले श्रीमतीलाई पछाडि राखी स्कुटर आफै चलाएर गएका थिए । अस्पतालबाट कैदी फरार भएको घटना थाहा पाएलगतै जिल्ला प्रहरी कार्यालय झापा, वडा प्रहरी कार्यालय भद्रपुरको टोली उनको खोजी कार्यमा लागि परेका छन् । फरार भएका साह भद्रपुर– ३ स्थित झोलुङ्गे पुल हुँदै मेचीपारि नाकाबाट भारततर्फ भागेको रहेछ । स्कुटरमा श्रीमान्– श्रीमतीसँगै भाग्दै गर्दा त्यहाँ खटिएका सशस्त्र प्रहरीले समेत देखेका थिए । जिल्ला प्रहरी कार्यालय झापाका एसपी मिलन केसीका अनुसार अस्पतालमा उपचाररत रहेका बेला कैदी भागेको हो ।
उनको खोजीका लागि प्रहरी टोली परिचालन गरिसकेको उनले बताए । केहीदिन अघि मात्र इलाका प्रहरी कार्यालय बिर्तामोडका एकजना थुनुवा हतकडी फुस्काइ बिर्तासिटी अस्पताल बिर्तामोडबाट फरार भएका थिए । फरार भएको चार दिनपछि भदौ ८ गते उनी बिर्तामोड बसपार्कबाट पक्राउ परेका थिए ।
प्रतिक्रिया दिनुहोस !
