सिरहा : हुण्डी सम्बन्धी कसुर गर्ने तीन जनालाई सिरहा प्रहरीले पक्राउ गरेको छ। उनीहरूको साथबाट प्रहरीले स्रोत नखुलेका १४ लाखभन्दा बढी रकम नगद, मोबाइल सेट र मोटरसाइकल पनि बरामद गरेको हो। प्रहरीले तीनै जनालाई शुक्रबार पक्राउ गरे पनि आज सार्वजनिक गरेको हो।
पक्राउ पर्नेमा सप्तरीको राजविराज नगरपालिका-१० का ५७ वर्षीय मजित मियाँ, सोही ठाउँ बस्ने वर्ष २८ का मोहम्मद अलाहउद्दिन र २३ वर्षीय अजय चौधरी रहेका जिल्ला प्रहरी कार्यालय सिरहाका प्रवक्ता तथा डीएसपी मुक्तिनाथ सापकोटाले बताए।
भारतबाट सीमावर्ती गाउँपालिका भगवानपुर चौक हुँदै लहानतर्फ आइरहेको बेला गोप्य सूचनाका आधारमा सखुवानन्कारकट्टी गाउँपालिका-५ मा स ९ प ११६२ नम्बरको मोटरसाइकल रोकी चेकजाँच गर्दा उनीहरू पक्राउ परेका छन्।
उनीहरूको साथबाट प्रहरीले स्रोत नखुलेको १४ लाख १९ हजार ८ सय ९० नेपाली र ४ सय भारतीय रुपैयाँ बरामद गरेको छ। उनीहरू चढेको मोटरसाइकल र तीन थान मोबाइल पनि प्रहरीले नियन्त्रणमा लिएको छ।
मोटरसाइकल चालक मजित मियाँ आफ्नो कम्मरमा बाँधेको निलो रंगको पटुकाभित्र ८ लाख १४ हजार ८९० नेपाली रुपैयाँ र ४०० भारतीय रुपैयाँ राखेका थिए।
यस्तै सोही मोटरसाइकलको बीचमा सवार मो. अल्लाउदिन लगाएको आफ्नो पाइन्टको कम्मर निरको खल्ती २ लाख ४ हजार ५ सय नेपाली रुपैयाँ र पछाडि सवार अजय चौधरीले आफ्नो कम्मरमा बाँधेको सुन्तला रंगको पटुकाभित्र ४ लाख ५ सय नेपाली रुपैयाँ भेटिएको थियो।
अदालतबाट हुण्डीसम्बन्धी कसुर मुद्दामा ५ दिनको म्याद लिएर यस विषय थप अनुसन्धान कार्य भइरहेको सिरहाका प्रहरी प्रवक्ता सापकोटाले जानकारी दिए।
प्रतिक्रिया दिनुहोस !
