काठमाडौं : राष्ट्रिय प्राकृतिक स्रोत तथा वित्त आयोगले राष्ट्रपतिसमक्ष वार्षिक प्रतिवेदन पेश गरेको छ । शुक्रबार राष्ट्रपति भवन शीतल निवासमा राष्ट्रपति रामचन्द्र पौडेल समक्ष आयोगका अध्यक्ष बालानन्द पौडेलले आर्थिक वर्ष २०८०/०८१ को आयोगको वार्षिक कामहरूको प्रतिवेदन पेश गरेका हुन्।
सो अवसरमा राष्ट्रपति पौडेलले वित्तीय संघीयता कार्यान्वयनमा आयोगको भूमिका र दायित्व महत्वपूर्ण रहेको बताए। उनले वित्तीय संघीयता अन्तर्गत राजश्व बाँडफाँट, वित्तीय समानीकरण अनुदानलगायतका जिम्मेवारी अनुरुप आयोगले थप व्यवस्थित, सुदृढ र प्रभावकारी ढंगले काम गर्ने विश्वास व्यक्त गरे ।
उनले आयोगका सिफारिसहरूलाई सरकारले कार्यान्वयन गर्ने गरि अघि बढ्नुपर्ने बताए । स्थानीय तहलाई व्यवस्थित गर्न आयोगले कडा नियमन गर्नुपर्ने र आयोगले नै नियम कानुन बनाउनुपर्ने आवश्यकता रहेको उनले बताए।
त्यस्तै शुक्रबार नै राष्ट्रपति पौडेलसमक्ष लोकसेवा आयोगको वार्षिक प्रतिवेदन पेश गरिएको छ । आयोगका अध्यक्ष माधवप्रसाद रेग्मीले आर्थिक वर्ष २०८०/०८१ को आयोगको वार्षिक कामहरूको प्रतिवेदन पेश गरेका हुन्।
प्रतिक्रिया दिनुहोस !
