गुल्मी : गुल्मीको गुल्मीदरबार गाउँपालिकाले गरिबी निवारणका लागि लघुउद्यम विकास कार्यक्रम सञ्चालन गरेको छ । यसबाट केही नयाँ उद्यमीसमेत बनेका छन् ।
गाउँपालिकाले हालै आर्थिक वर्ष २०८०/८१ को वार्षिक समीक्षा गरेको छ । गत आर्थिक वर्षमा गाउँपालिकाबाट सम्पादन भएका कामको प्रगति, चुनौती समस्या र समाधानका उपायबारे समीक्षा गरिएको हो ।
गत आर्थिक वर्षमा गाउँपालिकाका शाखाहरूबाट सम्पन्न भएका कार्यक्रम तथा क्रियाकलापको वार्षिक समीक्षा प्रतिवेदन पालिकाका प्रमुख प्रशासकीय अधिकृत भेषराज घिमिरेले पेस गरेका हुन् । आर्थिक वर्ष २०८०/८१ मा गाउँपालिकाको ४७ करोड ९५ लाख ६७ हजार कुल बजेटमा चालूतर्फ ९०.४२ र पुँजीगतर्फ ८६.३४ प्रतिशत रकम खर्च भएको प्रमुख प्रशासकीय अधिकृत घिमिरेले जानकारी दिए । उनका अनुसार पालिकाले आव २०७९/८० को ईएमआईएसमा भुक्तानीको प्रविष्टि र आव २०८०/८१ को नयाँ योजनाको माग र संकलन, नयाँ योजनाको ईएमआईएसमा प्रविष्टि, प्राथमिकताको आधारमा योजनाहरूको छनोट, बेरोजगार व्यक्तिको छनोट र कार्य, छनोट गरिएका योजनाको शुभारम्भ गरिएको छ ।
वार्षिक समीक्षा प्रतिवेदनमा योजनाका काम सञ्चालन र निरीक्षण तथा अनुगमन, वैदेशिक रोजगारीमा गएका श्रमिकको पुनः श्रम स्वीकृति, हरेक वडामा श्रमको सम्मान राष्ट्रको अभियान कार्यक्रम सञ्चालन, वैदेशिक रोजगारीसम्बन्धी सचेतनामूलक कार्यक्रम, कार्यसम्पादन भएका योजनाको भुक्तानी प्रक्रिया उल्लेख गरिएका छन् ।
आव. २०८०/८१ मा सबै वडामा एकीकृत घुम्ती शिविर सम्पन्न, २ सय ७८ योजना सम्झौता, १५ ठेक्का सम्झौता भएका छन् ।
प्रतिक्रिया दिनुहोस !
