घुस लिने र दिने दुवै अख्तियारको नियन्त्रणमा, आयोगले थाल्यो अनुसन्धान
असोज ९, २०८१ बुधबार १२:३७:१
झापा : अख्तियार दुरुपयोग अनुसन्धान आयोगले घुससहित पक्राउ परेका बुद्धशान्ति गाउँपालिका २ नम्बर वडाध्यक्ष डिल्लीप्रसाद ओलीमाथि अनुसन्धान सुरू गरेको छ । आयोगको टोलीले घुस लिने वडाध्यक्ष ओली र घुस दिने भारतीय नागरिक अमरनाथ चौहान दुवैलाई नियन्त्रणमा लिएर अनुसन्धान अघि बढाएको हो ।
अख्तियार दुरुपयोग अनुसन्धान आयोगको कार्यालय इटहरीबाट आएको टोलीले गएराति ९ बजेसम्म इलाका प्रहरी कार्यालय बिर्तामोडमा सर्जमिन मुचुल्का उठाएर दुवै जनालाई इटहरी लगिसकेको छ । थप अनुसन्धानका लागि बुधबार काठमाडौँ लगिने आयोगका सहायक प्रवक्ता देवीप्रसाद थपलियाले जानकारी दिए ।
सेवाग्राही चौहानसँग ८० हजार रुपैयाँ घुस लिँदालिँदै वडा अध्यक्ष ओलीलाई विप्लव नेतृत्वको नेकपा माओवादी पार्टीका कार्यकर्ताले मंगलबार दिउँसो करिब १ बजे बिर्तामोडस्थित हनुमान कम्प्लेक्स अगाडि पक्राउ गरी प्रहरीलाई जिम्मा लगाएको थियो ।
सेवाग्राही चौहानले बुद्धशान्ति गाउँपालिकामा आफ्नो व्यवसाय सञ्चालनका लागि स्थानीय चतुर्भुज घिमिरेसँग सहकार्य गरेका थिए । चौहानले बुद्धशान्तिमा जग्गा खरिदका लागि घिमिरेलाई भारतीय रुपैयाँ १४ लाख ५० हजार अर्थात् नेपाली रुपैयाँ २३ लाख २० हजार दिएका थिए । सोही रकम बमोजिम घिमिरेले बुद्धशान्ति ५ मा जग्गा खरिद गरेका थिए । पछि घिमिरेले भारतीय नागरिक भएकोले चौहानलाई धोका दिएर जग्गामा आफ्नो नाममा हड्पी हाले । चौहान पीडित भएपछि न्यायका लागि बुद्धशान्ति २ नम्बर वडा कार्यालय पुगे ।
वडा कार्यालयको मेलमिलाप समितिले दुवै पक्षलाई बोलाएर रकम फिर्ता वा जग्गा नामसारी गरिदिने सर्तमा लिखित कागज गराएका थिए । सो कागज वडा अध्यक्ष डिल्लीप्रसाद घिमिरेकै रोहबरमा २०८० साल चैत १ गते गराइएको थियो । कागजमा भनिएको छ, चौहानले घिमिरेलाई दिएको २३ लाख २० हजार रकममध्ये घिमिरेले २ लाख २७ हजार ३ सय रुपैयाँ खर्च भएको बताएकोले बाँकी रकम २० लाख ९२ हजार ७ सय रुपैयाँ २०८१ भदौ मसान्तभित्र वडा कार्यालयको रोहबरमा चौहानलाई उपलब्ध गराउने वा खरिद गरिएको जग्गा चौहानको विश्वासिलो व्यक्तिको नाममा नामसारी गरिदिने निर्णय भएको पत्रमा उल्लेख गरिएको छ ।
सोही निर्णय बमोजिम घिमिरेले चौहानलाई रकम फिर्ता गर्ने हुँदाहुँदै पछि वडा अध्यक्ष ओलीले पीडित चौहानसँग रकमको बार्गेनिङ गर्न थाले । रकम उपलब्ध गराइदिने सर्तमा वडा अध्यक्ष ओलीले चौहानसँग एक लाख भारु मागेका थिए ।
आफू पीडित भएकोले ५० हजार भारु मात्र दिन सक्ने भनेपछि अनन्त वडा अध्यक्ष ओली उनका कुरामा सहमत भए र रकम लिने बिर्तामोड आएका थिए । यता वडाध्यक्ष ओली पक्राउ परी निलम्बनमा परेपछि अब कसलाई कार्यवाहकको जिम्मा दिने सम्बन्धमा बुद्धशान्ति गाउँपालिका कार्यालयले छलफल अघि बढाइसकेको जनाइएको छ ।
प्रतिक्रिया दिनुहोस !
