बाढीले कुलेखानी ड्याममा क्षमताभन्दा बढी पानी, ३१ वर्षपछि २ ढोका खोलियो
असोज १२, २०८१ शनिबार ७:३४:५४
मकवानपुर : नेपाल विद्युत प्राधिकरणको ‘व्याकअप’ मानिने मकवानपुर स्थित कुलेखानी जलविद्युत केन्द्रको जलाशय इन्द्रसरोवर तालको २ वटा ढोका खोलिएका छन् । हिजो शुक्रवार बिहानैबाट सुरु भएको अविरल वर्षाका कारण कुलेखानी जलाशय भरिएपछि शनिबार बिहान ५:४० बजे ड्यामका २ वटा ढोका खोलिएको कुलेखानी जलविद्युत केन्द्र प्रथमका कार्यालय प्रमुख तारादत्त भट्टले जानकारी दिए ।
उनका अनुसार अहिले एउटा ढोका १ मिटर र अर्को आधा मिटर खोलिएको छ । यसअघि ३ वर्षअघि ड्याममा पानी भरिए पनि ढोका नै खोल्नु पर्ने स्थिति आएको थिएन ।
उनले भने, 'गत वर्ष कुलेखानी जलाशयमा एक हजार ५ सय २६ मिटरमात्र पानी संकलन भएको थियो । जलाशय समुन्द्री सतहदेखि १५ सय ३० मिटरको उचाइमा रहेको छ।
अहिले जलाशयमा क्षमता भन्दा बढी ३५ सेन्टिमिटर पानी संकलन भएको छ । जलाधार क्षेत्रमा लगातार पानी परिरहेकाले ड्यामको ढोका खोल्नु परेको हो । यसअघि ०५० साल अर्थात ३१ वर्षअघि जलाशय भरिएर ड्यामको ढोका खोलिएको थियो।
प्रतिक्रिया दिनुहोस !
