बाढी- पहिरोको कहर : बिपी राजमार्गमा दुई दिनदेखि ५ हजार यात्रु भोकभोकै

काभ्रे :तीन दिनदेखि परेको अविरल वर्षा कारण धेरै क्षति भएपनि जिल्लामा उद्धार हुन सकेको छैन। जिल्लामा विपत्  व्यवस्थापनको  बैठक बस्न सकिरहेको छैन । दुई महिना देखि काभ्रेका सिडीयो सूर्य सेडाई बिदामा छन् ।

उनी बिदामा हुँदा गृह मन्त्रालयले अर्को सिडीयो पठाएको छैन । विपत्मा मुख्य निर्णय गर्ने व्यक्ति नभएपछि काभ्रेमा अहिले बिपी राजमार्गमा फसेका करिब ५ हजार यात्रुहरू बेहालमा छन् । बिपी राजमार्गमा फसेका यात्रुहरू दुई दिन देखि भोकभोकै बस्नु परेको उनीहरूको गुनासो छ ।

 बिपी राजमार्गको नेपालथोकदेखि कटुन्जेसम्म ठाउँठाउँमा बाढी र पहिरोले राजमार्ग बगाएको छ।  राजमार्ग बगाए पछि आवतजवात गर्न सक्ने अवस्था नरहेको रोशी गाउँपालिका उपाध्यक्ष मिम बहादुर लामाले जानकारी दिए । ठाउँ ठाउँमा धेरै सडक पहिरोले लगेपछि यात्रुलाई हिँड्न सक्ने अवस्था नरहेको लामाले बताए । 

मंगलटार ईलाका प्रहरी कार्यालय प्रहरी निरीक्षक कृष्ण गिरीले बिपी राजमार्गमा रोशी गाउँपालिका भित्र मात्र करिब ५ हजार यात्रु फसेको जानकारी दिए । प्रहरीले बाटो नै टुटेको कारण यात्रुहरूलाई उद्धार गर्न कठिन भएको गिरीले बताए ।

 धेरै यात्रुहरू भोकभोकै जाग्राम बसेर उद्धारको लागि अपिल गरिरहेको प्रहरी निरीक्षक गिरीले बताए । शनिबार बेलुका धुलिखेलबाट उडेका हेलिकोप्टर समेत बस्ने ठाउँ नभएर फर्किनु परेको गिरीले जानकारी दिए । बिपी राजमार्गको नेपालथोक, मंगलटार, नार्के, कटुन्जेमा यात्रुहरू अलपत्रमा परेका छन् ।

उनीहरू दुई दिनदेखि उद्धारको पर्खाईमा रहेको सप्तरीबाट काठमाडौं आउँदै गरेकी अर्चाना पोखरेलले बताइन् । एउटा स्कुलमा दुई हजार बढि पीडित बस्नु परेको र उद्धारका लागि कुनै निकाय सम्पर्कमा नआएको उनले बताइन् ।