गोरखा : झ्याप्ले खोला पहिरोमा पुरिएको गोरखाको बसभित्र पाँचजनाको शव भेटिएको छ । चालक दलका तीन र दुई यात्रुको शव भेटिएको गोरखा दरौँदी यातायात सेवा प्रालिका अञ्जन खत्रीले जानकारी दिए ।
आइतबार उद्धारका क्रममा बसभित्र ना ४ ख २२७० नम्बरको बस र सोका धनी तथा चालक मदन परियारको शव पहिचान भएको हो । उनी भिमसेन थापा गाउँपालिका -४ धावाका हुन् ।
साथै चालक दलक धावा निवासी विनय भट्टराई र फुजेलका नवराज तिवारीको शव फेला परेको खत्रीले बताए । दुईजना यात्रुमध्ये एकजना धार्चे गाउँपालिका- ७ खानीगाउँका २७ वर्षीय सुकबहादुर गुरुङ रहेको त्यहाँका वडाअध्यक्ष राकेश गुरुङले पुष्टि गरेका छन् ।
अर्का यात्रु सुकबहादुरकै सम्पर्कमा मुग्लिनबाट सो बसमा चढेका थिए । उनको पहिचान नखुलेको उनले बताए । गत शुक्रबार धार्चे ७ लापुवेशीबाट काठमाडौंका लागि छुटेको सो बस आइतबारसम्म सम्पर्कबिहीन थियो । झ्याप्ले खोला पहिरोमा धेरै सवारी साधन पुरिएकाले खोजीका क्रममा सो बस र उनीहरू भेटिएका हुन् ।
प्रतिक्रिया दिनुहोस !
