सिन्धुली–नेपालथोक खण्डमा अवरुद्ध बिपी राजमार्ग खुल्यो, यात्रुको हेलिकोप्टरबाट उद्दारको तयारी
असोज १३, २०८१ आइतबार १६:१२:५७
सिन्धुली : बिहीबारबाट बाढी र पहिरोका कारण पूर्णरुपमा अवरुद्ध बनेपा–सिन्धुली–बर्दिबास (बिपी) राजमार्गको सिन्धुली –नेपाल थोक खण्ड सुचारु भएको छ । उक्त राजमार्गअन्तरगत सुनकोसी गाउँपालिका ७ कानढुङ्ग्री, दुम्जालगायतका स्थानमा बाढीका कारण क्षति भएको राजमार्गमा नेपाली सेना,स्थानीय पालिका, यातायात कार्यालय, प्रहरी तथा स्थानीयको पहलमा अस्थायी निर्माण गरिएपछि सुचारु भएको हो ।
सिन्धुलीका प्रहरी प्रमुख गोविन्दराज काफ्लेका अनुसार ठाउँठाउँमा अवरुद्ध राजमार्गको अवरोध हटाउँदै सिन्धुलीदेखि नेपालथोकसम्म यातायात सञ्चालन गर्ने अवस्था आएको छ । राजमार्ग अवरुद्ध हुँदा तीनदिनदेखि बीच बाटोमै फसेका यात्रुहरूलाई सिन्धुलीतर्फ फर्काउन सहज हुने उनको भनाइ छ ।
‘अवरुद्ध स्थानहरमा अस्थायी मर्मत तथा बैकल्पिक व्यवस्थापन गरेर तत्कालका लागि एकतर्फी भने पनि यातायातका साधन सञ्चालन गर्न सकिने बनाएका छौं । अब बीच बाटोमा अलपत्र यात्रु र सवारी साधनलाई सिन्धुलीतर्फ फर्काउन, नेपाली सेना,सशस्त्र प्रहरी, नेपाल प्रहरी र स्थानीय लागिपरेका छन्,’उनले भने ।
‘पूर्व तथा मध्यतराईबाट काठमाडौं हिँडेका सयौं सवारी साधनहरू बीच सडकमै अलपत्र पर्दा निक्कै समस्या भएको थियो । उनीहरूलाई काठमाडौंलगायतका गन्तव्यसम्म पुर्याउन तत्काल सम्भावना छैन । नेपालथोक–धुलीखेल खण्डमा दर्जनौं स्थानमा अवरुद्ध छ । त्यसैले सिन्धुलीतर्फ फर्काउन थालिएको हो,’उनले थपे ।
सुनकोसी नदीमा आएको बाढीका कारण सुनकोसी गाउँपालिका ७ कानढुङ्ग्री, वडा नम्बर १ को नेपाल थोक, आँपघारी, भ्याकुरेखोला, बर्खेखोला, घ्याम्पेखोला लगायतका दर्जनौं स्थानमा बाढी र पहिरोले राजमार्गलाई क्षति पु्र्याएको थियो ।
‘नेपालथोकसम्म राजमार्ग सुचारु गर्ने अवस्था आएपनि अन्य स्थानमा सडक डाइभर्सन गर्न अझै केही दिन लाग्ने छ । त्यसका लागि पनि प्रमुख जिल्ला अधिकारीले सम्बन्धित निकायसँग समन्वय गरिरहनुभएको छ ,’ काफ्लेले भने ।
नेपालथोक र मंगलटार बीचका यात्रुहरूलाई भने हेलिकोप्टर मार्फत् उद्दार गर्ने तयारी गरिएको छ । सडक अवरुद्ध हुँदा सिन्धुलीबाट काठमाडौंतर्फ जाँदै गरेका एम्बुलेन्सहरू समेत बीच सडकै फसेका छन् । ति एम्बुलेन्सका दुईजना बिरामीको मृत्यु भइसकेको छ ।
अन्य यात्रुहरसमेत खान र बस्नको समस्या छ । सडकमा अलपत्र परेका यात्रुहरूलाई नेपाली सेना,सुनकोसी गाउँपालिकाले खाद्यान्न, पानीलगायतका राहत वितरण समेत गर्दै आएको छ । नेपालथोकदेखि धुलीखेलसम्म तत्काल राजमार्ग सुचारु गर्न कठिन भएपछि हेलिकोप्टरबाट उद्धार गर्न गृह मन्त्रालय र नेपाली सेनासँग समन्वय गरिएको छ ।
यस्तै जिल्लाका मध्येपहाडि लोकमार्गका दर्जनौं स्थानमा पहिरो गएपछि अवरुद्ध नै छ । मदन भण्डारी राजमार्ग भने अहिले सञ्चालनमा आएको छ ।
प्रतिक्रिया दिनुहोस !
