ससूराको हत्यामा संलग्नलाई भगाएको आरोपमा महिला पक्राउ
विराटनगर : ससूराको हत्यामा संलग्नलाई भगाएको आरोपमा मोरङबाट एकजना महिला पक्राउ परेकी छन् । इलाका प्रहरी कार्यालय पथरीका डीएसपी मोहनविक्रम दाहालका अनुसार मोरङको पथरीशनिश्चरे नगरपालिका–७ की ३० वर्षीया सुष्मा राईलाई पक्राउ गरिएको हो ।
पथरीशनिश्चरे–७ मायालु चोकमा ससुराको हत्या गर्ने युवकलाई भाग्न सहयोग गरेको आरोपमा सुष्मालाई पक्राउ गरिएको उनले बताए । घरभित्रै हत्या गरिएको अवस्थामा ६० वर्षीय चन्द्रबहादुर तामाङको शव गत असोज ५ गते बिहान फेला परेको थियो ।
आफ्नै घरको प्यासेजमा रगतमा डुबिरहेको अवस्थामा चन्द्रबहादुरको विभत्स शव भेटिएको हो । टाउको र चिउँडोलगायत शरीरका विभिन्न भागमा धारिलो हतियारले प्रहार गरी उनको हत्या गरिएको डीएसपी दाहालले बताए । उनका अनुसार चन्द्रबहादुरको हत्या आफ्नै ज्वाइँ २७ वर्षीय रविन राईले गरेका हुन् ।
घरमा सँगै मादक पदार्थ सेवन गरेपछि सामान्य विवाद भएको र रविनले ससूराको हत्या गरेको प्रहरीले जनाएको छ । घटनापछि फरार भएका रविन भोलिपल्ट धनकुटाको मूलघाटबाट पक्राउ परेका थिए । तर, ससुराको हत्यापछि उनलाई सुष्माले भगाएको जानकारी डीएसपी दाहालले दिए ।
‘ससुराको हत्या गरेपछि सुष्माको घरमा पुगेर रविनले घटनाको जानकारी गराएछन् । त्यसपछि सुष्माले नै उनलाई भगाउन भूमिका खेलेको पत्ता लाग्यो । गाडी भाडाबापत २ सय रूपैयाँसमेत दिएर पठाएको यकिन भएको छ । रविनलाई भागेर आफन्तको घरतिर जाँदै गर्दा फेला पारिएको थियो,’ उनले भने ।
दाहालले घटनाका बारेमा प्रहरीलाई खबर गर्नुपर्नेमा चुपचाप बसेर उल्टै हत्यामा संलग्नलाई भगाउन भूमिका खेलेका कारण पक्राउ गरेर अनुसन्धानको दायरामा ल्याइएको बताए । उनका अनुसार सुष्माविरुद्ध कर्तव्य ज्यान कसुरको मतियारका रूपमा मुद्दा चलाउन अदालतबाट म्याद थप गरेर अनुसन्धानको थप प्रक्रिया अघि बढाइएको छ ।
रविनकै बयानका आधारमा सुष्मालाई प्रहरीले मंगलबार घरबाटै पक्राउ गरेको हो । उनीहरुबीचमा त्यसअघिदेखि नै चिनजान रहेको प्रहरीले जनाएको छ । प्रहरीका अनुसार उनका पति जमकुमार राई वैदेशिक रोजगारीमा दुबईमा छन् । सुष्माका १ छोरा र २ छोरी छन् । रविन आफ्नै ससुराली घरमा ससुरासँगै बस्दै आएका थिए । रविनको घर पनि ससुराली घरनजिकै छ ।
चन्द्रबहादुरकी छोरी (रविन)की पत्नी विदेशमा रहेको प्रहरीले जनाएको छ । चन्द्रबहादुरका २ छोरा, १ छोरी र पत्नी छन् । पत्नी र छोराछोरी सबैजना विदेशमा रहेको डीएसपी दाहालले बताए ।
मृतक चन्द्रबहादुरको शवको पोस्टमार्टम बिपी कोइराला स्वास्थ्य विज्ञान प्रतिष्ठान धरानमा गरिएको थियो । उनको हत्यामा संलग्न ज्वाइँ रविनविरुद्ध कर्तव्य ज्यान मुद्दा चलाउन अनुसन्धान भइरहेको जानकारी डीएसपी दाहालले दिए ।