आजदेखि नवरात्री सुरू : पाल्पाका भगवती मन्दिरमा पुजापाठ गर्नेको भीडभाड

तानसेन : आज बडा दशैंको पहिलो दिन घटस्थापना। पाल्पाका विभिन्न शक्तिपीठ तथा देवी भगवतीका मन्दिरमा भक्तजनहरूको भीडभाड बढेको छ । भक्तजनहरू  बिहानै नदी, तलाउ,धारा, कुवामा स्नान गरी चोखो वस्त्र पहिरिएर पुजापाठ तथा दर्शनका लागि भगवतीका मन्दिर पुगेका छन् ।

पाल्पालीहरूले शुभ साइतमा घटस्थापना गरेका छन् ।  जिल्लाको डाँडा टाकुरामा रहेका भगवती दुर्गाका मन्दिर सरसफाइ गरी आज नवरात्रीदेखि देवीको नित्य पूजाआजा सुरू गरिएको छ । 

तानसेनको भगवती मन्दिरमा परम्परागत नेवारी भाषाको डाफा भजनले सबैको मन तानेको छ ।  लोपोन्मुख अवस्थामा पुगेको नेवारी डाफा भजन संरक्षणको वृद्धवृद्धादेखि युवाहरूको सहभागी रहेको छ । परम्परागत भजन संस्कृति बुढापाकामा मात्र रहेको अवस्थामा  युवाहरूलाई समेत डाफा भजन स्तुतिमा सहभागी गराएर तानसेनको पुरानो भजन संस्कृतिको जर्गेनाको लागि सहयोग पुगेको संस्कृतिकर्मी राजेन्द्र गोपाल सिंहले बताए । 

भगवती मन्दिरमा तानसेन भजन संरक्षण समिति र भगवती भजन समूहले नियमितरुपमा नवरात्रीभरी डाफा भजन गर्दै आएका भगवती मन्दिर गुठी व्यवस्थापन समितिका अध्यक्ष अशोक महर्जनले बताए ।  

तानसेनको भगवती मन्दिर, रम्भापानीको रम्भा देवी मन्दिर,भुवनपोखरीको रैनादेवी मन्दिर,बतासेको कालिका मन्दिरलगायतका मन्दिरमा  पूजाआजाको लागि भक्तजनको अध्याधिक भीड हुने गर्दछ । पाल्पामा नवदुर्गाको समयमा  मन्दिर वरिपरी विभिन्न समूहबाट देवीको स्तुति भजन गर्ने परम्परा रहिआएको छ।