धरान : सुनसरीको विभिन्न स्थानबाट लागूऔषधसहित प्रहरीले तीन जनालाई पक्राउ गरेको छ। धरान उपमहानगरपालिका-८ स्थित तिनकुने चेकपोस्टबाट प्रतिबन्धित लागूऔषधसहित २ जना र बर्जु गाउँपालिका-५ बाट गाँजा सहित १ जनालाई प्रहरीले पक्राउ गरेको सुनसरीका प्रहरी प्रमुख एसपी सुम्क्नकुमार तिम्सिनाले बताए।
इलाका प्रहरी कार्यालय धरानबाट खटिएको प्रहरी टोलीले धरान-८ तीनकुनेमा काँकरभिट्टाबाट धरान आउँदै गरेको प्रदेश १-०१-००१ ख ४१९५ नम्बरको बसको सिटमुनी झोला भित्र लुकाइराखेको प्रतिबन्धित लागूऔषध ट्रमाडोल ४ हजार ७ सय ५० क्यापसुल बरामद गरिएको एसपी तिम्सिनाले जानकारी दिए। उनले लागूऔषध ओसारपसारमा संलग्न धरान-५ का २२ वर्षीय युवराज लिम्बु र १८ वर्षीय रोहित राईलाई समेत नियन्त्रणमा लिएको बताए।
यसै गरी विशेष सूचनाका आधारमा इलाका प्रहरी कार्यालय दुहबीबाट खटिएको प्रहरी टोलीले बर्जु गाउँपालिका-५ बाट २५ किलोग्राम गाँजासहित देवानगन्ज गाउँपालिका-१ का १८ वर्षीय ललन मेहतालाई पक्राउ गरेको जिल्ला प्रहरी कार्यालय सुनसरीका प्रवक्ता डीएसपी राम तिमल्सिनाले बताए।
उनले दुहबी नगरपालिका-७ बाट १७ किलोग्राम गाँजा सहित को २८ प ५८३५ नम्बरको मोटरसाइकलसमेत बरामद गरेको बताए। लागूऔषधसहित पक्राउ परेका उनीहरूको थप अनुसन्धान भइरहेको प्रहरीले बताएको छ।
प्रतिक्रिया दिनुहोस !
