काठमाडौं : गत असोज १२ मा पहिरोले पुरिएर मृत्यु भएका ६ खेलाडीका परिवारलाई अखिल नेपाल फुटबल संघ (एन्फा)ले प्रतिपरिवार आठ लाख रुपैयाँ दिने भएको छ। आइतबार बसेको एन्फाको आपतकालीन बैठकले मकवानपुरको इन्द्रसरोवर गाउँपालिका सिस्नेरीस्थित बात्सल्यदेवी एकेडेमीमा फुटबल सिकिरहेका ६ खेलाडीका परिवारलाई जनही आठ लाख रुपैयाँ दिने निर्णय गरेको हो।
लगातारको वर्षापछि आएको पहिरोमा परी बात्सल्यदेवी एकेडेमीमा अध्ययनरत आदित्य बलम्पाखी, विकल रेग्मी, प्रियान्स आचार्य, दिवश बानियाँ, अनुपम घलान र साइमन योञ्जनको परिवारलाई जनही आठ लाख रुपैयाँ दिने निर्णय गरेको हो। बैठकले प्रत्येक बालकको नाममा परिवारले चाहेको ठाउँ र क्षेत्रमा दुई लाख रुपैयाँको अक्षयकोष स्थापना गरिदिने र एन्फाले सञ्चालन गर्ने विद्यालयस्तरीय छात्र फुटबल प्रतियोगितालाई ६ खेलाडीको स्मृतिमा सञ्चालन गर्ने निर्णय पनि गरेको छ।
बैठकले सो घटनाको छानबिन गर्न एन्फा केन्द्रीय सदस्य विकासनारायण श्रेष्ठको संयोजकत्वमा तीन सदस्यीय समिति गठन गरेको छ। समितिमा केन्द्रीय सदस्य टीकाराम लामा र सहायक महासचिव दामोदर भट्टराई सदस्य छन्। उनीहरुलाई एक महिनाभित्र प्रतिवेदन बुझाउने समयसीमा तोकिएको छ।
बैठकले असोज २१ गते सातदोबाटोस्थित एन्फा कम्प्लेक्स, सम्पूर्ण जिल्ला, प्रदेश र क्लबहरुमा साँझ ५ बजे दीप प्रज्ज्वलनसहित श्रद्धाञ्जली कार्यक्रम आयोजना गर्ने निर्णय पनि गरेको एन्फा प्रवक्ता सुरेश साहद्वारा जारी विज्ञप्तिमा जनाइएको छ।
प्रतिक्रिया दिनुहोस !
