पोखरा : पर्यटकीय राजधानी पोखरामा चिनियाँ खेलाडी र नेपाली खेलाडीबीच तेस्रो पोखरा अन्तर्राष्ट्रिय क्रस क्रन्ट्री दौड प्रतियोगिताको तयारी थालिएको छ । आगामी नोभेम्बर ९ मा रन फर कमन प्रोसप्रेरिटी भन्ने नाराका साथ तेस्रो पोखरा अन्तर्राष्ट्रिय पर्वतीय क्रसकन्ट्री प्रतियोगिता आयोजना हुन लागेको हो ।
पर्यटन प्रवद्र्धनसँगै पोखरा अन्तर्राष्ट्रिय विमानस्थलको सञ्चालनमा सहयोग पुर्याउने र नेपाल–चीन सम्बन्धलाई थप सृदृढ बनाउने उद्देश्यले प्रतियोगिता आयोजना गरिन लागिएको हो ।
प्रतियोगितामा सहभागी हुन नोभेम्बर ७ मा चार्टर विमानमा चिनियाँ पर्यटक पोखरा आउने आयोजकले जानकारी दिए । चिनियाँ खेलाडीका लागि कुनमिङबाट पोखरासम्म चार्टर उडानको व्यवस्था गर्न लागिएको हो । प्रतियोगितामा नेपाली र चिनियाँ गरी ९० खेलाडीको सहभागिता रहनेछ । १० चिनियाँ टोली र २० नेपाली टोलीको सहभागिता रहने प्रतियोगिता ५० किलोमिटर दौड, साइक्लिङ र बोटिङ हुनेछ ।
एक टोलीमा तीन खेलाडी सहभागी हुने प्रतिस्पर्धामा कम्तीमा एक महिला अनिर्वाय हुनुपर्ने छ । फेवाताल किनारबाट सुरु हुने दौड छोरेपाटनहुँदै फुस्रे खोलासम्म खेलाडी दौडने छन् । त्यसपछि रामदी, फेदीखोला हँुदै कुबिन्डेसम्म साइकलमा जाने छन् । पुनः दौडेर शान्ति स्तुप हुँदै फेवाताल किनारसम्म दौडने छन् । फेवातालबाट डुंगा दौड गर्दै बाराही घाटमा पुगेर टुंगिनेछ ।
यसैगरी, च्यालेन्ज इन्डिभिजुअल समूहमा दुई सय खेलाडीको सहभागिता रहनेछ । ८० चिनियाँ र १ सय २० नेपाली खेलाडी सहभागी हुने प्रतिस्पर्धामा २३ सय ६६ मिटरको उचाइसम्म पुग्नु पर्नेछ ।
प्रतियोगिताको उपाधि विजेता टोलीले ४ लाख ५८ हजार ४ सय, दोस्रोले ३ लाख ४३ हजार ८ सय र तेस्रो हुनेले २ लाख २९ हजार २ सय रुपैयाँ पुरस्कार पाउनेछन् । प्रतियोगिता सञ्चालन गर्न ६ करोड रुपैयाँ लाग्ने आयोजक संस्था हिमालयन टुरिजम फोरमका अध्यक्ष विश्वशंकर पालिखेले जानकारी दिए ।
प्रतिक्रिया दिनुहोस !
