वीरगन्ज : वीरगन्जबाट लागू औषध अफिमसहित दुई जना पक्राउ परेका छन् । पर्साको कालीकामाई गाँउपालिका- १ का ५३ वर्षीय सुरेश प्रसाद कलवार र छिपहरमाई गाँउपालिका-१ का २९ वर्षीय भारती प्रसाद यादवलाई प्रहरीले पक्राउ गरेको हो।
कलवार कालीकामाई गाँउपालिकाका अध्यक्ष वशिष्ठ प्रसाद कलवारका बुबा हुन् । उनीहरूलाई लागु औषध अफिम जस्तो देखिने पदार्थ ४ सय १८ ग्रामसहित पक्राउ गरिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक दीपक भारतीले जानकारी दिए ।
प्रहरी नायब उपरीक्षक भारतीका अनुसार, उनीहरू दुवै जनालाई वीरगन्ज महानगरपालिका - १० आदर्शनगरस्थित कलवारको घरबाट शनिबार बिहान प्रहरीले नियन्त्रणमा लिएको हो । कलवारको घरको कम्पाउण्डभित्र पार्किङ गरेर राखिएको ना ४८ प ३७६४ नम्बरको पल्सर मोटरसाइकलमा लुकाएर राखिएको अफिम बरामद गरेको प्रहरीले जनाएको छ।
दुवै जनालाई जिल्ला प्रहरी कार्यालय पर्साको हिरासतमा राखेर थप अनुसन्धान भइरहेको प्रहरी नायब उपरीक्षक भारतीले बताए ।
प्रतिक्रिया दिनुहोस !
