अन्नपूर्ण चक्रिय पदमार्गमा विदेशी पर्यटकको रोमाञ्‍चक साइकलिङ यात्रा

जोमसोम : लमजुङको बेसी सहरदेखि मनाङहुँदै थोरङपास गर्दै मुस्ताङ प्रवेश गर्ने कतिपय विदेशी पर्यटक रोमाञ्चक साइकलिङ यात्रामा रमाउने गरेका छन् । साहसिक यात्रा गर्न रुचि राख्ने विदेशी पर्यटकहरूले अन्नपूर्ण पदमार्गअन्तर्गत मनाङ हुँदै मुस्ताङ प्रवेश गर्ने क्रम बढेको हो ।

अनुकूल मौसमसँगै अन्नपूर्ण चर्किय पदमार्गमा यात्रा गर्ने विदेशी पर्यटकको संख्या सन् २०२४ को सेप्टेम्बरदेखि ह्वात्तै बढेको हो । यस पदमार्गमा विदेशी पर्यटकहरू पैदलयात्रा तथा  साइकलिङ यात्रा गर्न रुचाउँछन् । यसै क्रममा विभिन्न ५ भन्दा बढी देशका विदेशी पर्यटकहरू लमजुङको बेसी सहर हुँदै मनाङबाट साइकलिङ यात्रा गर्दै मुस्ताङको मुक्तिनाथ झरे । समुन्द्री सतहको झन्डै ५ हजार  माथिको  उचाईमा अवस्थित अन्नपूर्ण पदयात्रा गर्ने क्रममा  १५ विदेश र ३ जना नेपाली पथप्रर्दशक साइकलिङ टोली आइतबार जोमसोम आइपुगेको हो । 

साइकलिङ यात्रामा ३ जना अमेरिकन,३ जना अष्ट्रेलियन, ३ जना क्यानेडा, २ जना युके र ४ जना युरोपियन पर्यटक ५ दिनको रोमाञ्चक साइकलिङ यात्रा गर्दै मनाङ हुँदै मुस्ताङ आइपुगेको साइकलिङ पथप्रर्दशक गाइड अजय पन्डित क्षेत्रीले जानकारी दिए । साइकलिङ टोलीमा नेपाली र विदेशी गरी १८ जनाको सहभागिता रहेको पथप्रर्दशक गाइड क्षेत्रीले बताए ।

विभिन्न विदेशी मुलुकका १५ विदेशी पर्यटक अक्टोबर ६ तारिखमा लमजुङको बेसी सहरबाट साइकलिङ पदयात्रा सुरू गरेको र एक हप्ता खर्चिएर साइकलिङ टोली मुस्ताङ आइपुगेको पदप्रर्दशक क्षेत्रीको भनाई छ । अन्नपूर्ण पदमार्गमा साइकलिङ गर्दै मुक्तिनाथ झरेको टोली त्यहाँबाट आफूले बोकेका झोलाहरू गाडी रिर्जभ गरी पठाएको र साइकलिङ टोली बेनी जोमसोम रामार्ग सडक हुँदै सोमबार म्याग्दीको तातोपानीमा बास बसेको प्रथप्रर्दशक क्षेत्रीले खुलाई मंगलबार पोखरा पुगेर राउन्ड अन्नपूर्णको साइकलिङ पदयात्रा अन्त्य हुने उनले जनाए । 

मनाङको  साइकलिङ यात्रा विदेशी पर्यटकका लागि रोमाञ्चक र अविष्मणीय भएको पथप्रदर्शक क्षेत्रीले सुनाए । विदेशी पर्यटकले अनुभूति गरेको भनाइ उदृत गर्दै प्रथप्रर्दशक क्षेत्रीले भने,‘आहा कति राम्रो भूगोल,कति राम्रो प्राकृतिक सौन्दर्यता,यहाँ आइपुग्दा त स्वर्गमै पुगेको अनुभूति भयो,कति राम्रो देश ,कति मिजासिला मानिस ।’ नेपाल आउँद राउण्ड अन्नपूर्ण पदयात्रा एक पटक भ्रमण गर्नुनै पर्ने रहेको विदेशी पर्यटकले आफूहरूलाई बताएको नेपाली गाइड क्षेत्रीले सुनाए ।

राउण्ड अन्नपूर्ण पदयात्रा क्रममा खोलानाला, अप्ठ्यारो , जोखिमयुक्त पदमार्ग र उच्च स्थानको भूगोलले विदेशी पर्यटक साइकलिङ यात्रामा पृथक अनुभुति गरेको उनले बताए । कूल ७ दिनको अविष्मणीय साइकलिङ यात्रा गर्दै मुस्ताङ भित्रिएका ५ मुलुकका १५ विदेशी पर्यटकले समुन्द्री सतहदेखि ५ हजार ४१६ मिटर अग्लो मनाङ र मुस्ताङको सिमाना थोरङला पास गर्दै मुस्ताङ प्रवेश गरेका हुन् । 

थोरङलापास क्षेत्रमा भिरोलो सतह र सेताम्मे हिउँका कारण करिब ४ घण्टासम्मको पदयात्रामा विदेशी पर्यटक आफैले लकेजसँगै साइकल बोकेर यात्रा गर्नुपरेको उनले सुनाए ।साइकलिङ पदयात्रा क्रममा थोरङपासमा उनीहरूले सामूहिक तस्बिर समेत खिचेका छन् ।

पछिल्लो समय सडक सञ्जाल विस्तार हुँदै गर्दा विदेशी पर्यटकको अन्नपूर्ण पदयात्रा समेत छोडिदै जान थालेको छ । मुस्ताङमा त झनै एक दशक अघिका पर्यटकीय पदमार्ग अधिकांश मासिदै जान थालेका छन् । नेपाल भ्रमण गर्ने पर्यटकका लागि राउण्ड अन्नपूर्ण चर्किय पदमार्ग उपयुक्त र एकमात्र विकल्प रहेको छ । अन्नपूर्ण पदमार्गमा यात्रा गर्ने सार्क राष्ट्रका पर्यटकलाई  नेपाली एक हजार र  अन्य मुलुकका विदेशी पर्यटकले ३ हजार रुपैयाँ प्रतिव्यक्ति राष्ट्रिय प्रकृति संरक्षण कोष,अन्नपूर्ण संरक्षण क्षेत्र आयोजनालाई पर्यटन शुल्क बुझाउनुपर्ने हुन्छ ।

सन् २०२४ को अक्टोबर १३ तारिखसम्म सार्क तथा अन्य मुलुकका गरी कूल ८ हजार ९०५ जनाले अन्नपूर्ण चर्किय पदमार्ग हुँदै मनाङबाट मुस्ताङ प्रवेश गरेको एक्याप जोमसोमका कार्यालय प्रमुख प्रमोदराज रेग्मीले जानकारी दिए ।

उनका अनुसार मनाङबाट मुस्ताङ प्रवेश गर्नेहरूमा ८ हजार ६६५ जना फरेनर विदेशी छन् भने  २३८ जना सार्क राष्ट्रका विदेशी पर्यटक रहेका छन् । सन् २०२४ मा अन्नपूर्ण पदयात्रा गर्दै सबैभन्दा बढी विदेशी पर्यटकको फलो अक्टोबरमा हुने प्रक्षेपण गरिएको छ । अक्टोबर सकिन अझै आधा महिना बाँकी रहँदा यस याममा १ हजार २६१ जनाले पदयात्रा गरिसकेको एक्याप जोमसोमको तथ्यांकमा उल्लेख छ । चेक पोस्टको तथ्यांक अनुसार यसअघि सेप्टेम्बरमा ९७४ जनाले राउण्ड अन्नपूर्ण पदयात्रा पुरा गरेका थिए । जनवरीदेखि सेप्टेम्बरसम्मको अभिलेख हेर्दा सबै भन्दा बढी अप्रिलमा २ हजार ७२६ जना र सबै भन्दा कम  जुलाईमा १२२ जनाले मात्रै अन्नपूर्ण पदयात्रा गरेका छन् ।

सन् २०२४ मा अन्नपूर्ण चर्किय पदमार्गमा यात्रा गर्ने पर्यटकको तथ्यांक हेर्दा ९७ दशमलव २५ प्रतिशत विदेशी फरेनर पर्यटक छन् भने  २ दशमलव ७५ प्रतिशत सार्क राष्ट्रका विदेशी पर्यटक रहेको बताइएको छ ।