बेनी : म्याग्दीको अन्नपूर्ण गाउँपालिका–६ बिरौटामा दूध संकलन केन्द्र स्थापना भएको छ । गाउँका कृषकले उत्पादन गरेको दूध बजारीकरण गर्ने उद्देश्यले सिद्ध बहुउद्देश्यीय सहकारी संस्थाले संकलन केन्द्र स्थापना गरेको हो ।
करिव सात लाख रुपैयाँको लगानीमा डिपफ्रिज, चिलिङ र मिल्क एनालाइजर मेसिन खरिद गरी संकलन केन्द्र सञ्चालन गरेको सहकारीका कोषाध्यक्ष युवराज बरुवालले जानकारी दिए । हिमालयन चिज उद्योग कोरोना महामारीका कारण बन्द भएपछि घाराका कृषकले उत्पादन गरेको दूधले बजार पाउन सकेको थिएन ।
गाउँका कृषकबाट दूध संकलन गरेर पोखरेबगर, भुरुङ्ग–तातोपानी, नारच्याङ, दाना, घोडेपानीमा लगेर बेच्ने व्यवस्था मिलाएको बरुवालले बताए । ३५ जना कृषकहरूले दैनिक एक सय ४० लिटरका दरले संकलन केन्द्रमा दूध ल्याउने गरेका छन् ।
थोरै दूध उत्पादन गर्ने कृषकले पनि बेचेर आम्दानी गर्ने तथा व्यवसायिक गाईभैसीपालन गरेका कृषकको समयको बचत र बजारको सुनिश्चित भएको छ । बजारमा बिक्री नभएको दूध प्रसोधन गरेर चिज उत्पादन गर्ने तयारी गरेको सहकारीका अध्यक्ष बिमल बरुवालले बताए ।
‘बचत तथा ऋणको मात्र कारोबार गर्दै आएकोमा अब दूध संकलन र बिक्री वितरण गर्न थालेको हो,’ उनले भने ‘वि.स. २०६६ मा स्थापना भएको सहकारीलाई पछिल्लो छ वर्षयता नियमित सञ्चालन गरेका छौ ।’ अन्नपूर्ण गाउँपालिकाका अध्यक्ष भारतकुमार पुनले दूध, तरकारी, फलफुल, आलु दूवानीका लागि कृषि एम्बुलेन्स सञ्चालन गरेको बताए ।
प्रतिक्रिया दिनुहोस !
