अपराधलाई न्यूनीकरण गर्न प्रहरी संगठनलाई प्रविधियुक्त बनाऔं : मुख्यमन्त्री आचार्य

बुटवल : लुम्बिनी प्रदेशका मुख्यमन्त्री चेतनारायण आचार्यले प्रहरी संगठनलाई अझ बलियो बनाउनका लागि बदलिँदो परिवेश अनुसार रुपान्तरण गर्नुपर्नेमा जोड दिएका छन् ।

६९ औं प्रहरी दिवसको अवसरमा बुधबार प्रदेश प्रहरी तालिम केन्द्र बुटवलमा आयोजना गरिएको कार्यक्रमलाई सम्वोधन गर्दै आचार्यले बढ्दो अपराधलाई न्यूनीकरण गर्न समय अनुसार प्रहरी संगठनलाई प्रविधियुक्त बनाउँदै लैजानुपर्ने बताएका हुन् । 

‘अपराधहरु बढ्दै गएका छन् । चुनौतीहरू थपिदैं छन् । सोही अनुसार प्रहरी संगठन बदलिँदो परिवेश अनुसार रुपान्तरण हुनु जरुरी छ।’,आचार्यले भने,‘प्रहरीले मुलुकमा शान्ति सुरक्षा कायम गर्न, बढदो अपराधलाई न्यूनिकरण गर्न महत्वपूर्ण भूमिका खेलेको छ । फेरिदो परिवेश अनुसार समाजमा हुने अपराध न्यूनीकरण गर्न आधुनिकीकरण गरेर अघि बढ्नु पर्छ ।’ 

अपराध अनुसन्धानको क्षेत्रमा प्रहरीको योगदानका कारण लुम्बिनी प्रदेशको शिर उचो बनेको समेत मुख्यमन्त्री आचार्यले सुनाए । ‘लुम्बिनी उत्कृष्ट प्रदेश बन्न सफल भएको छ । प्रदेशको शिर उचो बनाउन यहाँहरुले गरेको योगदानको उच्च करद गर्न चाहन्छु।’उनले भने,‘अमर शहिदको योगदान र बलिदानको स्मरण गर्न चाहन्छु । अमर प्रहरीको योगदान र परिवार प्रति गर्नुपर्ने दायित्व राज्यले सधैं निर्वाह गर्ने छ ।’  सेवा प्रवाहमा उत्कृष्ट कार्यसम्पादन गर्ने प्रहरीलाई सम्मान गरिएको छ ।