दाङ : लुम्बिनी सरकारले प्रदेशको राजधानी सहर निर्माणका लागि लगानी खोज्ने भएको छ। सुन्दर र व्यवस्थित सहर निर्माण गर्न तयार पारिएको गुरु योजनाअनुसार राजधानी क्षेत्रको सहर बनाउन लगानी खोज्न लागिएको हो।
लुम्बिनी प्रदेश सरकारले १ खर्बको लागतमा २० वर्षभित्र निर्माण सम्पन्न गर्ने लक्ष्यसहित नदी सभ्यतामा आधारित नमुना सहर निर्माण गर्न लगानीको खोजी सुरु गरेको हो। पहिलो चरणमा २५ अर्ब बजेटको स्रोत सुनिश्चित गर्न सरकारले पहल थालेको मुख्यमन्त्री चेतनारायण आचार्यले बताए। ‘राजधानी सहर निर्माणका लागि चाहिने स्रोतको खोजी भइरहेको छ’, मुख्यमन्त्री आचार्यले भने, ‘ऋण लिएर भए पनि जग्गा एकिकरण र शहर निर्माणको कामलाई तिब्रता दिने योजनामा प्रदेश सरकार छ। यसका लागि मुख्य गरी स्थानीय नागरिक, राजनीतिक दलहरू र जनप्रतिधिहरूको सामूहिक प्रतिबद्धता आवश्यक छ।’ उनीहरूको प्रतिबद्धता प्राप्त भएकै दिनबाट सरकारले ऋण प्राप्तिको प्रक्रिया थाल्ने मुख्यमन्त्री आचार्यले बताए। उनले भने, ‘प्रदेश सरकारको बजेटले राजधानी शहर निर्माण धान्न सक्दैन। संघ सरकारको बजेट पनि अपुग हुन्छ। यसका लागि दातृ निकायहरूको साथ र सहयोग अपरिहार्य छ। यहि कारण प्रदेश सरकार लगानी खोज्ने अभियानमा लागेको हो।’
यसैबीच लुम्बिनी प्रदेश सरकारले राजधानी सहर निर्माणबारे हालसम्म भएका प्रगति र भावि योजनाको बारेमा सरोकारवाला पक्षसँग छलफल गरेको छ। मुख्यमन्त्री चेतनारायण आचार्यले संस्थापक मुख्यमन्त्री शंकर पोख्रेल, पूर्वमुख्यमन्त्री डिल्लीबहादुर चौधरी, प्रदेश सरकारका मन्त्री, संसदीय दलका प्रतिनिधि, प्रदेश सभा सदस्यहरूको उपस्थितीमा राजधानी सहर निर्माणबारे हालसम्म भएका प्रगती र भावी योजनाको बारेमा छलफल गरेका छन्। राजधानी क्षेत्रका स्थानीय जनप्रतिनिधि, उद्योगी व्यवसायीलगायत सरोकारवाला पक्षहरूसँग राजधानी शहर निर्माण बारे छलफल र सुझाव संकलन गरिएको छ। सरकारले लिएको लक्ष्यअनुसार छिटो सहर निर्माणको काम अघि बढाउन जग्गा एकीकरणको कामले गति लिनुपर्ने सरोकारवालाले सुझाव दिए।
संस्थापक मुख्यमन्त्री शंकर पोख्रेलले प्रदेश राजधानी व्यवस्थापन गर्ने प्रमुख जिम्मेवारी सरकारको मात्रै नभएर राजधानी क्षेत्रका स्थानीय बासिन्दाको पनि हुनुपर्ने बताए। ‘राजधानी व्यवस्थित गर्ने जिम्मेवारी राजधानीबासीको पनि हो। भविष्यका पुस्तालाई सुविधायुक्त जीवन र सुविधा सम्पन्न सहर सुम्पिने दायित्व सबैको रहन्छ’, संस्थापक मुख्यमन्त्री पोख्रेलले भने, ‘कसैले त्याग नगर्दासम्म राम्रो सहर बन्न सक्दैन। भर्जिन ल्याण्डमा आउनुको कारण आधुनिक सहर निर्माणको उद्देश्य हो। अव्यवस्थित र समस्याग्रस्त राजधानी सहर चाहिएको छैन। सहर निर्माण बारेको दृष्टिकोण अब हामीले बदल्नु जरुरी छ।’
१४ प्लट निर्माण
प्रदेश पूर्वाधार विकास प्राधिकरणका अनुसार जग्गा एकीकरणको काम अघि बढेको छ। एक हजार विगाह जग्गालाई १४ वटा प्याकेजमा बाँडेर नमुना प्लट निर्माणको काम अघि बढेको प्राधिकरणका प्रमुख कार्यकारी अधिकृत छविराज पोख्रेलले जानकारी दिए। जग्गा एकीकरणको कामलाई तीव्रता दिन र पूर्वाधार निर्माण गर्न स्रोतको अभाव रहेको उनले बताए।
प्रतिक्रिया दिनुहोस !
