नेपालले अमेरिकालाई सुपरओभरमा हरायो, एक खेल अगावै जित्यो सिरिज

काठमाडौं : नेपालले अमेरिकाविरुद्ध रोमाञ्चक जित हात पारेको छ। आइतबार डालासमा भएको टी-२० शृंखलाको दोस्रो खेलमा नेपालले सुपर ओभरमा रोमाञ्चक जित हात पारेको हो।

यससँगै नेपालले एक खेल अगावै अमेरिकाविरुद्धको शृंखला जितेको छ। टस जितेर ब्याटिङ गरेको नेपालले निर्धारित ओभरको खेलमा ६ विकेट गुमाएर १७० रन बनाएको थियो। नेपालका लागि कुशल भुर्तेलले सर्वाधिक ९२ रन बनाए। भुर्तेलले ५४ बलमा ७ चौका र ६ छक्का प्रहार गरे। त्यस्तै अनिल साहले २५, गुल्शन झाले १९ र रोहित पौडेलले १८ रन बनाए। 

जवाफी ब्याटिङ गरेको अमेरिकाले निर्धारित ओभरको खेलमा ८ विकेट गुमाएर १७० रन बनाएपछि खेल टाइ भएको थियो। अमेरिकाका लागि एन्ड्रीज गौजले सर्वाधिक ६२ रन बनाए। त्यस्तै सैतेजा मुक्कामालाले ४७, मिलिन्द कुमारले १५ र सयान जहगिंरले १४ रन बनाए। नेपालले यसअघि पहिलो खेलमा अमेरिकालाई १७ रनले हराएको थियो।

सुपर ओभरमा के भयो ?

सुपर ओभरमा सोमपाल कामीले धारिलो बलिङ गर्दै ४ बलमा अमेरिकाको २ विकेट लिन सफल भएका हुन्। अमेरिकाले सुपर ओभरमा चार बल ३ रनको चुनौती दिएको थियो। 

ब्याटिङमा उत्रिएका अमेरिकाका आरोन जोन्स र शायन जहाँगीरलाई सोमपालले लगातार तेस्रो र चौथो बलमा आउट गरेका थिए।तेस्रो बलमा सोमपालले सायानलाई बोल्ड गरेका थिए । लगतै चौथो बलमा सोमपालले जोन्सलाई दीपेन्द्रसिंह ऐरीद्वारा क्याच गराएका हुन् ।

सुपर ओभरमा तीन रनको लक्ष्य पछ्याएको नेपालले ४ बल खेल्दै जित निकालेको हो। पहिलो र दोस्रो बलमा १/१ रन जोडेको नेपालले तेस्रो बल डट फालेको थियो। चौथो बलमा रन जोड्दै नेपालले सिरिज उचालेको हो।

सुपर ओभरमा कप्तान रोहितकुमार पौडेल र कुशल भुर्तेलले ब्याटिङ गरेका थिए। यो सँगै नेपालको आजको खेलमा सोमपाल नायक बने।