वीरगन्ज : पर्साको पोखरियामा आयोजित पोखरिया गोल्डकप फुटबलको उपाधि वीरगन्ज युथ एकेडमीले जितेको छ। आइतबार भएको फाइनल खेलमा पर्साको विरुवागुठीलाई टाइबेकरमा ५–३ गोलले पराजित गर्दै वीरगन्जले उपाधि जितेको हो।
निर्धारित ९० मिनेटको खेल गोलरहित बराबरीमा सकिएपछि खेलको अन्तिम नतिजा ट्राइबेकरबाट गरिएको हो। उपाधिसँगै वीरगन्जले नगद १ लाख ११ हजार १ सय ११ रुपैयाँ नगदसहित ट्रफी प्राप्त गर्यो भने उपविजेता बिरुवागुठीले नगद ५१ हजार १ सय ११ रुपैयाँमै चित्त बुझाउनु पर्यो। प्रतियोगिताको समापन समारोहमा प्रमुख अतिथि नेपाली कांग्रेसका नेता तथा पूर्वमन्त्री सुरेन्द्रप्रसाद चौधरीले उपाधि विजेता र उपविजेता टिमका खेलाडीलाई नगद पुरस्कार, ट्रफी र मेडल प्रदान गरे।
दसैं, दिपावली र छठ पर्वको उपलक्ष्यमा पोखरिया–४ को वडासमिति कार्यालय र नवदूर्गा पूजा समितिले आयोजना गरेको फुटबल प्रतियोगिताको उद्घाटन गत आइतबार मधेस प्रदेशका भूमि व्यवस्था, कृषि तथा सहकारी मन्त्री जनार्दन सिंह क्षेत्रीले गरेका थिए। प्रतियोगितामा ८ वटा टिमले भाग लिएका थिए।
प्रतिक्रिया दिनुहोस !
