गोरखा : गोरखाको दुर्गम खोर्ला गाउँका ३८ वर्षीय पतासिङ गुरुङलाई स्थानीय एक सामाजिक संस्थाले सम्मान गरेको छ । ३८ वर्षको उमेरमा पनि निराश नभई पढेर एसईई उत्तीर्ण गरेको भन्दै धार्चे गाउँपालिका–३ खोर्लाको सामुदायिक जनसेवा केन्द्रले दसैंको अवसर पारेर गुरुङलाई सम्मान गरेको स्थानीय छिरिङ गुरुङले जानकारी दिए ।
स्थानीय सातकन्या माविले घरदैलो कार्यक्रम गरेका बेला उनी कक्षा ८ मा भर्ना भई दुई वर्ष लगालग पढेर पाको उमेरमा एसईई उत्तीर्ण गरेको गुरुङले बताए । पढाइलाई उमेरले छेक्दैन भन्ने सन्देश दिएका उनलाई गाउँपालिकाका अध्यक्ष लक्ष्मण गुरुङले कदरपत्रसहित सम्मान गरेका हुन् ।
अब उनको कम्प्युटर साइन्स पढ्ने रहर छ । मजबुरीका कारण यो वर्ष पढ्न नसके पनि अर्को वर्ष ११ कक्षामा भर्ना भई पढ्ने पतासिँङ बताउँछन् । ‘यही वर्ष नभए २–३ वर्षपछि भए पनि ११ मा भर्ना भएर पढ्छु, । सकेसम्म कम्प्युटर साइन्स लिएर पढ्ने इच्छा छ’, उनले भने । पाको उमेरमा एसईई उत्तीर्ण गरेर सम्मान पाउँदा खुसी लागेको उनको भनाइ छ । ‘सबै गाउँलेहरू भेला भएर सम्मान गरे । सम्मान पाउँदा अलिअलि लाज र धेरै खुसी महसुस गरेँ’, उनले भने ।
पढाइ छाडेको २१ वर्षपछि उनी पुनः विद्यालयमा भर्ना भई उनले पढेका हुन् । गुरुङले धार्चे–३ खोर्लास्थित सातकन्या माविबाट २०८० सालको एसईईमा सहभागी भई उत्तीर्ण गरेका हुन् । नियमितमा उत्तीर्ण हुन नसके पनि दोस्रो पटक मौका परीक्षा दिएर एसईई उत्तीर्ण गरेको पतासिङ बताउँछन् । ‘सुरुमा रिजल्ट आउँदा ४ वटा मुख्य–मुख्य विषयमा नै फेल भएको थिएँ, पछि दोस्रो पटक दोहो¥याएर परीक्षा दिएँ । सबै विषय कटेछ’, उनले भने ।
उनलाई श्रीमती, बालबच्चा र बा–आमाको जिम्मेवारीसहित पढ्ने कुरा सजिलो थिएन । ‘छोराछोरी पढाउने बेला बाउ आफैं स्कुल जान्छ’ भनेर छरछिमेकले कुरा नकाटेका पनि होइनन्, तर यसले उनलाई बिचलित बनाएन । पराइले कुरा काट्दा आफूलाई जसरी पनि एसईई उत्तीर्ण गरिछाड्ने जोश आएको उनी बताउँछन् ।
पढाइप्रतिको दृढ इच्छाशक्तिका कारण एसईई उत्तीर्ण गर्न सफल भएको उनी बताउँछन् ।पतासिङले खोर्ला गाउँमा विद्युत् महसुल संकलन गर्ने गर्दथे । विद्यालयसँगै आफ्नो जागिरलाई पनि निरन्तरता दिएका उनले हाल एसईई उत्तीर्ण भएसँगै विद्युत् प्राधिकरणमा अपरेटरका रूपमा जागिर पाएका छन् ।
प्रतिक्रिया दिनुहोस !
