जेठो गाई गौशालालाई लाखौं बढी बक्यौता उठाउनै सकस
गौशाला (महोत्तरी) : महोत्तरीस्थित देशकै जेठो गाई गौशाला निगौल गाई गौशालाको विभिन्न शीर्षकमा गरी ३५ लाखभन्दा बढी रकम बक्यौता उठाउन बाँकी छ । कार्यालय स्रोतले दिएको जानकारीअनुसार वर्षौंदेखि व्यावसायिक भवनको सटर, अधिनमा रहेको खेतबाट उठाउन बाँकी मनखप, ठेक्काबापत असुलउपर गर्न बाँकी रकम गरी ३५ लाख ४८ हजार ६ सय ७० रुपैयाँ छ ।
कार्यालय स्रोतले दिएको जानकारीअनुसार सटर भाडाबापत ४ लाख ६८ हजार ८ सय ५१ रुपैयाँ, बगैंचा ठेक्काबापत २ लाख ५५ हजार, नयाँ पोखरी ठेक्काबापत ६ लाख ६० हजार र पुरानो पोखरी ठेक्काबापत ८ लाख ५४ हजार ६ सय ५४ रूपैयाँ रहेका छन् । यता विभिन्न व्यक्तिहरूले मनखपमा लिएको खेतीयोग्य जग्गावापतको १३ लाख १० हजार १ सय ६५ रुपैयाँ बाँकी छ । बारम्बार लिखित एवं मौखिक रूपमा ती रकम वुझाउनका लागि सम्बन्धित पक्षलाई आग्रह गर्दै आएको कार्यालयका लेखापाल रोहितकुमार कर्णले जानकारी दिए ।
कार्यालयका नाममा बाँकी रहेको रकम उठाउनका लागि सरोकारवाला निकायसमक्ष पहलकदमी गर्ने कार्यालय स्रोतले जनाएको छ । निगौल गाई गौशाला मातहतमा रहेका सार्वजनिक सम्पत्तिको संरक्षणमा जुटेका कर्मचारीहरूले सेवाग्राहीबाट उल्टै बिनाकारण गाली बेइज्जती सहनुपरेको छ । जसले गर्दा उनीहरूको मन खिन्न भएको छ । राष्ट्रिय सहकारी वोर्डद्वारा सञ्चालित निगौल गाई गौशालाको अधीनमा रहेको कमर्सियल भवनको मासिक भाडा उठाउन जाने क्रममा त्यहाँँ पसल थापेकाहरूले उल्टै कर्मचारीलाई नानाथरी गाली बेइज्जती गर्ने गरेका छन् ।
व्यावसायिक भवनको कोठा नं. ६ मा सञ्चालनमा रहेको महालक्ष्मी खाद्य तथा वीज भण्डारका संचालक शम्भु साहसँग पैसा माग्न जाँदा आफूलाई गाली बेइज्जती गरिएको कार्यालय प्रमुख वीरबहादुर चौधरीले बताए । चौधरीले भने, ‘वर्षौंदेखि सटरको भाडा तिर्न बाँकी रहेकोले भाडा उठाउन आफ्नो टिमसहित जाँदा उल्टै आफूमाथि जाइलागेका थिए ।’