झापा दुर्घटना : पीडित पक्षसँग चार बुँदे सहमतिपश्चात् १२ घण्टापछि राजमार्ग सुचारु, १२ जना घाइते
झापा : पूर्वपश्चिम राजमार्ग अन्तर्गत झापाको कमल गाउँपालिका–३ स्थित केर्खामा भएको दुर्घटनामा हजुरबुवा र नातिनीको मृत्यु पश्चात् उत्पन्न विवाद १२ घण्टापछि साम्य भएको छ ।
पीडित पक्षसँग भएको चार बुँदे सहमतीपश्चात् अवरुद्ध बनेको राजमार्ग करिब १२ घण्टापछि सञ्चालनमा आएको हो। तनावपूर्ण स्थिति साम्य पार्न गए राति ९ बजेदेखि आज बिहान साढे २ बजेसम्म कमल ३ का वडाध्यक्ष अग्नि कोइरालाको घरमा भएको सर्वपक्षीय बैठकमा चार बुँदे लिखित सहमती भएको जनाइएको छ ।
सहमति अनुसार पीडित पक्षलाई अधिकतम क्षतिपूर्ति दिलाउन प्रयत्न गर्ने, जनप्रतिनिधि तथा प्रशासनको संयुक्त पहलमा दोषी चालकमाथि कारबाही लागि माग गर्ने, त्रिपक्षीय सहमतीलाई कार्यान्वयन गर्ने र कानुनी प्रक्रिया पूरा गर्नका लागि भइरहेको अवरोध हटाइ अगाडि बढ्ने सहमती गरिएको छ ।
सो बैठक कमल गाउँपालिकाका अध्यक्ष हुकुमसिंह राईको रोहवरमा वडाध्यक्ष कोइराला, पीडित पक्ष, नागरिक समाज र प्रहरी प्रशासनलगायत करिब २० जनाको उपस्थितिमा भएको थियो । उक्त सहमतीपश्चात् आज बिहान ३:५० बजेदेखि प्रहरीले आवश्यक कानुनी प्रक्रिया र मुचुल्काको कार्य पूरा गरी शवलाई पोस्टमार्टमको लागि दमक अस्पताल पठाएको छ ।
हिजो साँझ काँकडभिट्टाबाट काठमाडौँ हिँडेको प्र १–०१–००१ ख ४३३१ नम्बरको रात्रि बसले केर्खामा इलेक्ट्रिक साइकललाई ठक्कर दिँदा स्थानीय मनोज लिम्बूकी अन्दाजी ९ वर्षकी छोरी कृपा लिम्बू र उनका बुवा ६० वर्षीय टेकबहादुर लिम्बू मृत्यु भएपछि घटनास्थल तनावग्रस्त बनेको थियो ।
मृतक बालिकाको जन्मदिन परेको र जन्मदिन मनाउन नातिनीलाई लिएर हजुरबुबाले बर्थडे केक लिन गएका थिए । बर्थडे केक र मासु लिएर फर्कँदै गर्दा रात्री बसले उनीहरूलाई ठक्कर दिएको थियो । बस र बस चालक शिवसताक्षी नगरपालिका–१ का ३२ वर्षीय विशाल ठटाललाई नियन्त्रणमा लिएको जिल्ला प्रहरी कार्यालय झापाका डीएसपी कृष्णकुमार चन्दले जानकारी दिए ।
दुई वटा प्रहरी विटमा आगजनी, १२ प्रहरी घाइते
दुर्घटनापछि तनावग्रस्त बनेको केर्खामा १० प्रहरीसहित १२ जना घाइते भएका छन् । आक्रोशित भीडले ढुङ्गा प्रहार गर्दा डियुटीमा खटिएका प्रहरी घाइते भएका हुन्।
घाइते हुनेहरूमा नेपाल प्रहरीतर्फ ५ जना र सशस्त्र प्रहरीतर्फ ५ जना रहेका छन् । ढुङ्गाले लागेर घाइते हुनेहरूमा नेपाल प्रहरीतर्फ प्रहरी सहायक हवल्दार नवीन गडतौला, प्रहरी सहायक हवल्दार सुमित्रा कार्की, प्रहरी जवान सुजन बिक, प्रहरी सहायक निरीक्षक शिवशक्ति राई र प्रहरी सहायक हवल्दार विजय विश्वकर्मा रहेका छन् । त्यस्तै सशस्त्रतर्फ सशस्त्र प्रहरी हवल्दार रमेश खत्री, सशस्त्र प्रहरीहरू जवान उपेन्द्र यादव, प्रकाश चौहान, महेश यादव र कृष्ण भुजेल भएका छन् ।
त्यस्तै सर्वसाधारणतर्फ दुईजना घाइते भएका छन् । मोटरसाइकलमा यात्रा गर्दै गरेका बुद्धशान्ति –६ बस्ने ३३ वर्षीय नवराज गौतम र सोही मोटरसाइकलमा सवार उनकी श्रीमती ३२ वर्षीया कविता घिमिरे गौतम घाइते भएका हुन् । घाइतेहरूको अवस्था सामान्य रहेको प्रहरीले जनाएको छ ।
त्यस्तै अक्रोशितहरुले केर्खा ट्राफिक बिट र नेपाल प्रहरी बिट जलाउँदा पूर्ण रुपमा क्षति भएको छ । त्यस्तै प्रहरी चौकी केर्खामा रहेको सिसिटिभीको मनिटर ६४ इन्चको २ थान पूर्ण रुपमा फुटेको छ भने प्रहरी चौकी केर्खाको कार्यालय भवनको झ्यालको १६ वटा सिसा पूर्ण रुपमा फुटेको छ । कार्यालय कक्षको टेबल सिसा एक थान, गेटमा भएको प्रहरी चौकी केर्खा लेखिएको डिजिटल बोर्ड एक थान तोडफोड भएको छ ।
त्यस्तै कार्यालय कम्पाउन्डमा राखिएको कमल गाउँपालिकाको दमकलको अगाडीको सिसा र कार्यालय अगाडी राजमार्ग सुरक्षामा राखिएको दुई वटा सिसी क्यामेरा फुटाएका छन् । त्यस्तै प्रहरी सहायक निरीक्षक शिवशक्ति राईले बोकेर गएको डीएसएल क्यामेरा भीडले तानी तोडफोड गरेको छ ।
ठक्कर दिने प्रदेश १–०१–००१ ख ४३३१ नम्बरको बसको अगाडिको सिसा फुटेको छ भने दायाँ र बायाँपट्टिको सिसा सबै फुटेको छ । त्यस्तै मे १ ख २७४४ नम्बरको न्यु सूर्योदय यातायातको बसको दायाँ र बायाँपट्टिको २० वटा झ्यालको सिसा फुटेको र प्रदेश १–०१–००१ ख ४०३७ नम्बरको बसको बायाँ साइडको पछाडिको २ वटा झ्यालको सिसाहरू फुटेको प्रहरीले जनाएको छ ।
प्रहरीले स्थितिलाई नियन्त्रणमा लिन २९ सेल अश्रुग्याँस प्रहार गरेको थियो । नेपाल प्रहरीले १५ सेल र सशस्त्र प्रहरी बलले १४ सेल अश्रुग्याँस प्रहार गरेका हुन् ।