मधेसमा खानेपानी संकट समाधानका लागि ४२ अर्बको प्रोजेक्ट अगाडि बढाएको छु : मन्त्री यादव
कात्तिक १०, २०८१ शनिबार १४:१३:२६
वीरगन्ज : संघीय सरकारका खानेपानी मन्त्री प्रदीप यादवले तराई–मधेसमा दुई वर्ष यतादेखि विद्यमान खानेपानीको समस्या अल्पकालीन र दीर्घकालीन रूपमा समाधानका लागि काम गरिरहेको बताएका छन्।
वीरगन्जमा आयोजित एक कार्यक्रममा मन्त्री यादवले वर्षौं पहिले बनेर सञ्चालनमै नआई अलपत्र अवस्थामा रहेका मधेस प्रदेशका २ सय ८० वटा ओभर हेड ट्यांक सञ्चालनमा ल्याउनका लागि काम थालिसकेको बताए। ती ओभर हेड ट्यांक सञ्चालनमा ल्याउनका लागि मन्त्रिस्तरीय निर्णय गरेर आवश्यक बजेटको स्टिमेट तयार पारिसकेको उनले बताए। विज्ञहरूले ३ अर्ब रुपैयाँको स्टिमेट बनाएको भन्दै उनले अर्थमन्त्री विष्णु पौडेल अमेरिकाबाट फर्किए लगत्तै आगामी प्रक्रिया सुरु गरिहाल्ने मन्त्री यादवले बताए।
उनले भने,‘ करिब ४२ अर्ब रुपैयाँको त्यो प्रोजेक्ट हो। प्रोजेक्टको प्रक्रिया अगाडि बढाइसकेको छु। निकट भविष्यमै त्यसको टेण्डर पनि हुँदैछ। यसमा स्थानीय सरकार, प्रदेश सरकार र संघ सरकारका साथै विदेशी दाताको सहयोग लिएर काम हुन्छ।’
उक्त प्रोजेक्ट निर्माण भएपछि मधेसमा कहिल्यै पनि खानेपानीको समस्या नहुने दाबी उनले गरे। मन्त्री यादवले हेटौंडास्थित राप्ती नदीको पानी वीरगन्जसम्म ल्याएर भारतको बिहारसम्म लगेर नेपालको पानी बिक्री गर्ने योजनापनि औपचारिक रूपमा अगाडि बढाइसकेको बताए।
पर्सा क्षेत्र नम्बर १ का प्रतिनिधि सभा सदस्यसमेत रहेका मन्त्री यादवले संघीय सरकारको मन्त्री रूपमा आफूले गृह जिल्ला पर्सावासीको शीर ठाडो पार्ने गरी काम गरिरहेको जिकिर गरे। उनले भने,‘किनकी मैले काम गरेर देखाएको छु। मेरो काम बोलेको छ।’
प्रतिक्रिया दिनुहोस !
