नुवाकोट : चाडपर्वको समयमा बजारमा गुणस्तरहीन वस्तुको बिक्री वितरण भइरहेको गुनासो आएपछि नुवाकोटका विभिन्न बजार अनुगमन गरिएको छ । अनुगमनका क्रममा अखाद्य वस्तु जफत गरिएको छ ।
संयुक्त बजार अनुगमन टोलीले नुवाकोटको पूर्वीभेगमा रहेको ककनी गाउँपालिकाको विभिन्न वजारमा रहेका किराना तथा खाद्यान्न सप्लायर्स, होटल, खाजाघर र बेकरी उद्योगहरूको स्थलगत अनुगमन गरेको हो । सहायक प्रमुख जिल्ला अधिकारी कृष्णप्रसाद हुमागाईंको नेतृत्वमा गएको संयुक्त टोलीले विभिन्न २० वटा पसल तथा उद्योगहरूमा अनुगमन गरिएको उद्योग वाणिज्य कार्यालय नुवाकोटले जनाएको छ ।
संयुक्त बजार अनुगमन समितिद्वारा ककनी गापा ४ र ६ मा रहेको जुरेथुम, पैंतीसकिलो, रानीपौवा बजार र काउलेथानमा संयुक्त बजार अनुगमन गरिएको हो । अनुगमनका क्रममा अखाद्य वस्तु फेला परेपछि जफत गर्नुका साथै नगद जरिवानासमेत गरिएको छ ।
संयुक्त बजार अनुगमन समितिद्वारा विभिन्न १२ वटा खाद्यान्न, किराना पसल, ६ वटा होटल तथा खाजा घर र दुइटा वेकरी उद्योगको अनुगमन गरिएको अनुगमन समितिका सदस्य सचिव तथा उद्योग बाणिज्य कार्यालय नुवाकोटका प्रमुख किशोर सापकोटाले जानकारी दिए । उनका अनुसार ती बजारहरूबाट २२ हजार २५ रुपैयाँ बराबरको अखाद्य वस्तु जफत गरिएको छ ।
प्रमुख सापकोटाले अनुगमन गरिएका पसलहरूमध्ये लामिछाने बेकरी उद्योगले आवश्यक मापदण्ड पूरा नगरेका कारण तत्काल नगद जरिवाना गरिएको बताए । उपभोक्ता संरक्षण ऐन २०७५ बमोजिम पाँच हजार रुपैयाँ जरिवाना गरिएको जानकारी दिए ।
- चाडपर्वको समयमा बजारमा गुणस्तरहीन वस्तुको बिक्री वितरण भइरहेको गुनासो
- संयुक्त बजार टोलीले नुवाकोटको पूर्वीभेगमा रहेको ककनी गाउँपालिकाको विभिन्न वजारमा अनुगमन
- अनुगमनमा अखाद्य वस्तु फेला परेपछि जफत गर्नुका साथै नगद जरिवाना
अनुगमनका क्रममा पसलमा बिलबिजक अद्यावधिक नगरिएको, आवश्यक कागजात उपलब्ध नभएको र न्यूनतम् मापदण्डसमेत पूरा नगरेको पाइएको छ । अनुगमन टोलीले अखाद्य विभिन्न १० प्रकारका वस्तुहरू नियन्त्रणमा लिएर सामग्री नष्ट गरिएको छ ।
कतिपय किराना पसल तथा सप्लायर्सलाई सचेत गराई सुधार गर्ने आवश्यक निर्देशन दिइएको छ । सरोकारवालासहितको संयुक्त बजार अनुगमन टोलीले उपभोक्तासँग प्रत्यक्षसँग सरोकार रहेको पसलको स्थलगत अनुगमन गरिएको कार्यालयका प्रमुख किशोर सापकोटाले जानकारी दिए ।
उनका अनुसार अनुगमनका क्रममा अखाद्य वस्तु फेला परेपछि त्यसलाई नियन्त्रणमा लिइएको छ । बरामद गरिएका अखाद्य वस्तुहरू कतिपयलाई तत्काल र कपितपयलाई खाल्डो खनेर नष्ट गरिने अनुगमन टोलीका संयोजकसमेत रहेका सहायक प्रजिअ कृष्णप्रसाद हुमागाईंले जानकारी दिए ।
अनुगमनका क्रममा अधिकांश पसल तथा व्यवसायले न्युनतम् मापदण्डसमेत पुरा नगरेको पाइएको अनुगमन टोलीले जनाएको छ । पसलमा मूल्य सूची नराखेको, बिलबिजक जारी र नवीकरण नगरेकोे पाइएको थियो ।
अनुगमनका क्रममा अधिकांश पसल मापदण्डविपरीत रहेको पाइएको जिल्ला प्रशासन कार्यालय नुवाकोटले जनाएको छ । अधिकांश पसलहरू मापदण्ड अनुसार सञ्चालन नभएको पाइएको र पहिलो पटकलाई सचेत गराइएको सहायक प्रजिअ कृष्णप्रसाद हुमागाईंले बताए ।
प्रतिक्रिया दिनुहोस !
