संखुवासभाको मकालुमा टिपर दुर्घटना : दुई भारतीय मजदुरको मृत्यु
कात्तिक १५, २०८१ बिहीबार १०:१८:४६
संखुवासभा : संखुवासभामा टिपर दुर्घटना हुँदा अरुण तेस्रो जलविद्युत परियोजनामा कार्यरत दुईजना भारतीय मजदुरको मृत्यु भएको छ । दुर्घनामा दुईजना घाइते भएका छन् । घाइते हुनेहरू पनि भारतीय नागरिक नै हुन् ।
दुर्घटनामा ज्यान गुमाउनेमा टिपर चालक भारतीय नागरिक ५७ वर्षीय शैलेन्द्र प्रताप सिंह र टिपरमा सवार २९ वर्षीय सारुक महमद रहेको जानकारी संखुवासभा प्रहरी प्रमुख डीएसपी दक्षकुमार बस्नेतले जानकारी दिए। दुवैजनालाई उपचारका लागि जिल्ला अस्पताल खाँदबारी ल्याइएको थियो । चिकित्सकले बिहीबार बिहान करिब पौने ४ बजेतिर मृत घोषणा गरेका हुन् । दुवैको शव खाँदबारी अस्पतालमै छ ।
दुर्घटनामा परेर टिपरमा सवार भारतीय नागरिक २८ वर्षीय योगेन्द्र पाल र ४० वर्षीय ईश्वर पासवान घाइते भएको बस्नेतले बताए । उनीहरू पनि अरुण तेस्रोकै मजदुर हुन् ।
डीएसपी बस्नेतका अनुसार मकालु गाउँपालिका–५ फ्याक्सिन्दा दोभानमा एचपी ११–४९३३ नम्बरको टिपर बुधबार साँझ दुर्घटनामा परेको हो । अरुण तेस्रो जलविद्युत परियोजनाको काममा लगाइएको टिपर ड्याम साइडमा काम गरेर फर्किने क्रममा साँझ ७ बजेतिर आफै अनियन्त्रित भएर दुर्घटनामा परेको उनले बताए ।
टिपर सडकबाट करिब ५० मिटर तल खसेको थियो ।
घाइतेमध्ये गम्भीर अवस्थाका पासवानलाई थप उपचारका लागि बीपी कोइराला स्वास्थ्य विज्ञान प्रतिष्ठानतर्फ पठाइएको छ । सामान्य अवस्थाका पालको खाँदबारी अस्पतालमै उपचार भइरहेको छ । डीएसपी बस्नेतका अनुसार पासवान बिहार र पाल उत्तर प्रदेशका बासिन्दा हुन् । भिरालो ठाउँमा टिपर दुर्घटना भएका कारण उद्धारमा कठिनाइ भएको थियो ।
प्रहरीका अनुसार कच्ची सडक र खाल्डाखुल्डीका कारण दुर्घटना भएको हो । घटनास्थल सदरमुकाम खाँदबारीबाट करिब ५६ किलोमिटर उत्तरमा पर्छ । प्रहरीले घटनाको थप अनुसन्धान गरिरहेको छ ।
प्रतिक्रिया दिनुहोस !
