वीरगन्ज : वीरगन्ज-३ छपकैयाका युवक वीरेन्द्र साह सोनारको हत्यामा संलग्न युवकलाई बारा प्रहरीले बिहीबार सार्वजनिक गरेको छ।
वीरगन्ज महानगरपालिका-३ छपकैयाका अन्दाजी २६ वर्षीय युवक वीरेन्द्र साह सोनारको शव हत्या गरिएको अवस्थामा बाराको प्रसौनी गाउँपालिका-१ स्थित गण्डक नहरको त्रिवेणी पुल नजिक कात्तिक १ गते फेला परेको थियो। असोज २७ गते बाराको मुसहर्वामा लाग्ने मेला हेर्न भनेर घरबाट निस्किएका सोनारको शव कात्तिक १ गते पुल नजिक टाउको पछाडि चोट लागेको अवस्थामा भेटिएको थियो।
सोनारको हत्यामा संलग्न मुख्य आरोपित पर्साको बहुदरमाई नगरपालिका वडा नम्बर ९ का २८ वर्षीय विजयकुमार साह कलवारलाई बारा प्रहरीले सोनारको हत्या भएको एक हप्तापछि भारतको रक्सौलबाट पक्राउ गरेकोमा बिहीबारमात्रै पत्रकार सम्मेलन गरेर सार्वजनिक गरेको हो। सोनारको शव भेटिएकै दिन प्रहरीले सोनारकी श्रीमति मनिषा देवीलाई पनि नियन्त्रणमा लिएको थियो।
बिहीबारको पत्रकार सम्मेलनमा बाराका प्रहरी नायब उपरीक्षक प्रकाश सापकोटाले सोनारकी श्रीमती मनिषा र विजयबीच प्रेम सम्बन्ध रहेको र त्यसैका कारण विजयले सोनारको हत्या गरेको जानकारी दिए।
असोज २७ गते मुसहर्वाको मेला हेरेर फर्कने क्रममा राति ९.३० बजेको समयमा विजयले पछाडिबाट गम्छाले सोनारको घाँटीमा कसेर हत्या गरेको र शव गण्डक नहर छेउको त्रिवेणी पुलमुनि फालेर हिंडेको अनुसन्धानका क्रममा खुलेको प्रहरी नायब उपरीक्षक सापकोटाले बताए। सोनारको हत्यामा उनकी श्रीमती मनिषाको पनि मिलोमतो रहेको देखिएकाले उनलाई पनि प्रहरी हिरासतमा राखेर कानुनी कारबाही प्रक्रिया अगाडि बढाइएको उनले बताए।
प्रतिक्रिया दिनुहोस !
