जोमसोम : मुस्ताङ प्रहरीले जुवाखालबाट नगद ८ लाख ५२ हजारसहित १२ जना जुवाडेलाई रंगेहात पक्राउ गरेको छ।
मुस्ताङको घरपझोङ गाउँपालिका-२ मार्फाबाट आइतबार साँझ ५:३० बजे जुवातास खेलिरहेका १२ जना जुवाडेलाई मुस्ताङ प्रहरीले नगदसहित पक्राउ गरेको जनाएको छ। पक्राउ पर्नेमा अधिकांश घरपझोङ-२ मार्फाका छन्।
मुस्ताङको घरपझोङ-२ मार्फास्थित एक रेष्टुरेन्टको कोठा नं. २११ र कोठा नं. २०९ मा जुवातास खेले खेलाएको जानकारी पाएपछि जिल्ला प्रहरी कार्यालय मुस्ताङबाट खटिएको १५ जनाको प्रहरीले होटलमा छापा मारेको थियो। प्रहरीले होटल भित्र २ वटा कोठाबाट ८ बुक ताससहित ८ लाख ५२ हजार ८ सय रुपैयाँ बरामद गरेको जिल्ला प्रहरी कार्यालय मुस्ताङका सूचना अधिकारी गणेश सुवेदीले जानकारी दिए।
उनका अनुसार जुवातासको खालबाट पक्राउ परेका व्यक्तिहरू उपर आवश्यक छानबिनसहित अनुसन्धान भइरहेको छ।
प्रतिक्रिया दिनुहोस !
