अर्घाखाँचीको भूमिकास्थानमा बस दुर्घटना हुँदा एक जनाको मृत्यु, ८ घाइते
कात्तिक १९, २०८१ सोमबार १८:३८:५०
अर्घाखाँची : अर्घाखाँचीको भूमिकास्थान नगरपालिकामा भएको बस दुर्घटनामा एक जनाको मृत्यु भएको छ। ८ जना घाइते भएका छन्।
भूमिकास्थान नगरपालिका-५ र ६ को सिमाना जयठाटीमा अहिले बेलुका अन्दाजी ५ बजे देउसी भैलो नाचिरहेको स्थानमा ना३ख २४७१ नम्बरको बसको ब्रेक फेल भएपछि दुर्घटना भएको हो।
भैलो खेल्न आएको बसको एक्कासि ब्रेक फेल भई बाटोमा भैलो खेलि रहेका ग्रुपलाई ठक्कर दिएको जिल्ला प्रहरी कार्यालय अर्घाखाँचीका प्रमुख डीएसपी चक्रबहादुर मल्लले बताए। घटनास्थलमै एक महिलाको मृत्यु भएको छ।
घाइतेको अर्घाखाँची अस्पतालमा उपचारका लागि पठाइएको छ। प्रहरी र स्थानीयले घटनास्थलमा उद्धार गरेका छन्। घटनाको अनुसन्धान भइरहेको प्रहरी प्रमुख डीएसपी मल्लको भनाइ छ।
प्रतिक्रिया दिनुहोस !
