महोत्तरी : सर्लाहीको ईश्वपुर नगरपालिका २ भक्तिपुरको मियाँखोरमा रहेको पोखरीमा भएको सवारी दुर्घटनामा परि महोत्तरीका एक सञ्चारकर्मीको मृत्यु भएको छ । आज बिहान भएको सो दुर्घटनामा परि रेडियो गौशाला, गौशालाका संचालक ३७ वर्षीय सुरेशकुमार महतोको मृत्यु भएको हो ।
काम विशेषले सर्लाहीबाट घरतर्फ फर्किने क्रममा महतो आफैंले चलाइरहेको लु २ च ६७५८ नम्बरको कार अनियन्त्रित भएको थियो । कार पोखरीमा डुब्दा महतोसहित कारमा सवार सोनमा गाउँपालिका–८ महोत्तरीका ३७ वर्षीय रामाकान्त ठाकुरको पनि मृत्यु भएको हो । त्यस्तै सोही कारमा सवार अर्का गौशाला नगरपालिका–२, का ३१ वर्षीय जनक यादव भने सकुशल रहेका छन् ।
कारसहित पोखरीमा डुबेर दुईजना बेपत्ता भएका थिए। हाल कार र शवलाई पोखरीबाट निकालिएको छ ।
शवको पोस्टमर्टमका लागि प्रक्रिया शुरु भएको प्रहरीले जनाएको छ।
पोखरीबाट बाहिर निस्कन सफल कारमा सवार जनक यादवलाई प्रहरीले नियन्त्रणमा लिएको छ । घटनाको सम्बन्धमा थप अनुसन्धान भइरहेको जिल्ला प्रहरी कार्यालय सर्लाहीले जनाएको छ ।
प्रतिक्रिया दिनुहोस !
