पोखरा : सहकारी ठगी प्रकरणमा हिरासतमा रहेका राष्ट्रिय स्वतन्त्र पार्टी सभापति तथा पूर्व उपप्रधान एवं गृहमन्त्री रवि लामिछानेमाथि थप अनुसन्धानका लागि प्रहरीले कास्की मंगलबार अदालत लैजाँदै गर्दा उनका कार्यकर्ताले विरोध प्रदर्शन गरेका छन्।
सहिद चोकस्थित अदालत लैजाने बाटोमा जिल्ला प्रशासन कार्यालय नजिकै रास्वपा कार्यकर्ताको प्रदर्शन भएको हो। प्रदर्शनमा उत्रिएका कार्यकर्तामाथि प्रहरीले अश्रुग्यास प्रहार गरेको छ। पोखराको वाईचोकमा उपस्थित भएका रास्वपा कार्यकर्ताले रविको रिहाइको माग गर्दै सरकार विरोधी नारा लगाएका छन्।
कास्की प्रशासनले निषेधित क्षेत्र घोषणा गरेको ठाउँतिर रास्वपा कार्यकर्ता जान लागेपछि प्रहरीले अश्रुग्यास हानेर उनीहरुलाई अगाडि बढ्न रोकेको हो।
कात्तिक २ गते काठमाडौंमा पक्राउ परी पोखरा ल्याइएका रवि लामिछानेलाई पहिलोपटक ६ दिनका लागि र त्यसपछि ७ दिनका लागि अदालतले म्याद थप गरिदिएको थियो। तिहारअघि नै उनको हिरासत म्याद सकिएको थियो। विदा सकिएलगत्तै कास्की प्रहरीले मंगलबार फेरि अदालत उपस्थित गराएको हो। लामिछानेमाथि सहकारी ठगी, संगठित अपराध र सम्पत्ति शुद्धीकरणसम्बन्धी कसुरमा अनुसन्धानका लागि हिरासतमा राख्न कास्की प्रहरीले अदालतको अनुमति मागेको छ।
पोखराको सूर्यदर्शन सहकारी ठगी आरोपमा लामिछाने हिरासतमा छन्। सँगसँगै ग्यालेक्सी टेलिभिजनमा रविका तत्कालीन साझेदार तथा पूर्वडिआइजी छबिलाल जोशी, सूर्यदर्शन सहकारी ठगीमा जीबी राईसँगै मुटिएकी लीला पछाईं र रामबहादुर खनाललाई म्याद थपका लागि कास्की अदालत लगिएको छ।
प्रतिक्रिया दिनुहोस !
